15 aprel 2011-ci il tarixində Azərbaycan Respublikasının fövqəladə hallar naziri general-polkovnik Kəmaləddin Heydərov Macarıstan Respublikasının Bakıdakı fövqəladə və səlahiyyətli səfiri cənab Jolt Çutoranı qəbul etmişdir.

Görüş zamanı nazir FHN və onun qurumları, eyni zamanda, nazirlik tərəfindən həyata keçirilən və keçirilməsi planlaşdırılan layihələr, nüfuzlu beynəlxalq və regional təşkilatlarla, xarici dövlətlərin müvafiq qurumları ilə əlaqələrin inkişaf etdirilməsi istiqamətində görülən işlər barədə geniş məlumat vermişdir.

Səfir də öz növbəsində, görülmüş işləri yüksək qiymətləndirərək, hər iki dövlətin müvafiq qurumları arasında, həmçinin, beynəlxalq təşkilatlar çərçivəsində əməkdaşlığın dərinləşməsi üçün birgə səylər göstərilməsinin əhəmiyyətini qeyd etmişdir.