14 mart 2021-ci il saat 23:10-dək:
Bakı şəhərinin Suraxanı rayonunda ümumi sahəsi 120 m² olan birmərtəbəli 3 otaqlı evin yanar konstruksiyaları (taxta konstruksiyalardan ibarət) və içərisində olan əşyalar yanıb. Yanğın zamanı evdə həcmi 20 litr olan məişət qaz balonu partlayıb. Həcmi 5 və 50 litr olan 2 ədəd məişət qaz balonu yanğınsöndürənlərin səyi nəticəsində təhlükəsiz əraziyə təxliyə olunaraq yeni yanğın mənbələrinin və partlayışın yaranmasının qarşısı alınıb. Evə bitişik köməkçi tikili və həyətdə dayanan 2 ədəd minik avtomobili yanğından mühafizə olunub. Yanğın söndürülüb.
Yanğın yerinin kəşfiyyatı zamanı dağıntılar altında ev sahibi, 1955-ci il təvəllüdlü Hüseynov Ramiz Ənvər oğlunun yanmış meyiti aşkar olunaraq aidiyyəti üzrə təhvil verilib.
Hadisə ilə əlaqədar müvafiq qurumlar tərəfindən təhqiqat aparılır.
14 mart 2021-ci il saat 20:55-dək:
Bakı şəhəri, Suraxanı rayonu, Hövsan qəsəbəsində baş vermiş yanğın Fövqəladə Hallar Nazirliyinin Dövlət Yanğından Mühafizə Xidmətinin yanğından mühafizə bölmələri tərəfindən söndürülüb.
Əlavə məlumat veriləcək.
14 mart 2021-ci il saat 19:50-dək:
Fövqəladə Hallar Nazirliyinin (FHN) Böhran Vəziyyətlərində İdarəetmə Mərkəzinə Bakı şəhəri, Suraxanı rayonu, Hövsan qəsəbəsində birmərtəbəli fərdi yaşayış evində yanğın olması barədə məlumat daxil olub. FHN-nin Dövlət Yanğından Mühafizə Xidmətinin yanğından mühafizə bölmələri yanğının baş verdiyi əraziyə cəlb olunub. İlkin məlumata əsasən, yanğın yerinin kəşfiyyatı zamanı 1 nəfərin meyiti aşkar olunaraq aidiyyəti üzrə təhvil verilib. Hazırda yanğınsöndürmə işləri davam etdirilir.
Əlavə məlumat veriləcək.
15 mart 2021-ci il saat 15:00-dək:
Ağcabədi rayonu, Minaxorlu kəndində ümumi sahəsi 80 m² olan birmərtəbəli evin yanar konstruksiyaları və ev əşyaları yanıb. Yaxınlıqdakı tikililər yanğından mühafizə olunub. Yanğın yanğından mühafizə bölmələri tərəfindən söndürülüb.
14 mart 2021-ci il saat 07:45-dək:
Bakı şəhərinin Binəqədi rayonunda ümumi sahəsi 14 m² olan taxta konstruksiyalardan ibarət köməkçi tikili yanıb. Yaxınlıqdakı ağaclar yanğından mühafizə olunub. Yanğın yanğından mühafizə bölmələri tərəfindən söndürülüb.
14 mart 2021-ci il saat 03:00-dək:
Fövqəladə Hallar Nazirliyinin "112" qaynar telefon xəttinə daxil olan məlumata əsasən, Bakı şəhərinin Nəsimi rayonunda 2-si azyaşlı olmaqla 3 nəfər mənzildə bağlı qapı arxasında köməksiz vəziyyətdə qalıb. Çağırış ünvanına cəlb olunan Xüsusi Riskli Xilasetmə Xidmətinin müvafiq xilasetmə qüvvələri tərəfindən vətəndaşlara köməklik göstərilib.