Fövqəladə Hallar Nazirliyinin aidiyyəti qurumları tərəfindən fövqəladə hallarla bağlı davranış qaydaları barədə əhalinin maarifləndirilməsi məqsədilə silsilə tədbirlər keçirilib.

Belə ki, FHN-in Dövlət Yanğın Nəzarəti Xidmətinin mütəxəssislərinin də iştirakı ilə Şimal-qərb Regional Mərkəzi tərəfindən Qax rayon Statistika İdarəsi və Qax rayon Elektrik Şəbəkəsində, Şimal Regional Mərkəzi tərəfindən Xaçmaz rayon Sukanal idarəsində, Qarabağ Regional Mərkəzi tərəfindən Beyləqan rayon Tarix Diyarşünaslıq Muzeyində, Sumqayıt Regional Mərkəzi tərəfindən Abşeron rayonu, Digah Ailə Sağlamlıq Mərkəzində, Gəncə Regional Mərkəzi tərəfindən Gədəbəy rayonu, Kiçik Qaramurad kənd tibb məntəqəsində, Cənub Regional Mərkəzi tərəfindən Lənkəran Regional Meşə Təsərrüfatı Mərkəzində, Aran Regional Mərkəzi tərəfindən Yevlax rayon Gigiyena və Epidemiologiya Mərkəzində, Sumqayıt Regional Mərkəzi tərəfindən Xızı Rayon İcra Hakimiyyəti Kommunal Müəssisələr Kombinatında maarifləndirmə tədbirləri keçirilib.

Tədbirlərin keçirilməsində məqsəd baş verə biləcək təbii və texnogen xarakterli fövqəladə hadisələrlə bağlı zəruri davranış qaydaları barədə vətəndaşlara müvafiq biliklərin verilməsi olub.

Tədbirlərdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğınların baş vermə səbəbləri və bu zaman zəruri davranış qaydaları barədə ətraflı məlumat verilib, FHN-in “112” qaynar telefon xəttinin təyinatı izah olunub, ilkin yanğınsöndürmə vasitələrindən istifadə qaydaları əyani şəkildə nümayiş etdirilib.

İnteraktiv formada keçirilən tədbirlər zamanı suallar ətraflı cavablandırılıb.