17-18 sentyabr 2012-ci il tarixlərində Azərbaycan Respublikasının fövqəladə hallar naziri general-polkovnik Kəmaləddin Heydərovun başçılıq etdiyi nazirliyin nümayəndə heyəti Avstriya Respublikasında rəsmi səfərdə olmuşdur.

Səfər çərçivəsində nazir Kəmaləddin Heydərov Atom Enerjisi üzrə Beynəlxalq Agentliyin Baş Konfransının 56-cı sessiyasında iştirak etmişdir.

Səfər zamanı Azərbaycan Respublikasının fövqəladə hallar naziri Kəmaləddin Heydərov və Avstriya Respublikasının federal daxili işlər naziri xanım Johanna Mikl-Leitner arasında görüş keçirilmişdir. Görüşdə hər iki ölkənin fövqəladə halların idarə edilməsi üzrə müvafiq dövlət qurumları arasındakı mövcud əlaqələrin inkişaf etdirilməsi, gələcək əməkdaşlıq perspektivləri və digər qarşılıqlı maraq doğuran məsələlər ətrafında fikir mübadiləsi aparılmışdır.

Eyni zamanda, Kəmaləddin Heydərov tanışlıq məqsədilə Avstriya Respublikası Daxili İşlər Nazirliyinin Böhranların Əlaqələndirilməsi Mərkəzində, Federal Təhlükəsizlik Akademiyasında və Vyana Yanğından mühafizə Briqadasında olmuşdur.