Fövqəladə Hallar Nazirliyinin Aran Regional Mərkəzi tərəfindən Ağdaş rayon Qaradağlı kənd İnzibati Ərazi Dairəsi üzrə Nümayəndəliyinin əməkdaşları və kəndin işləməyən əhalisi üçün “Fövqəladə hallarla bağlı davranış qaydaları” mövzusunda maarifləndirmə tədbiri keçirilib.

Tədbir Nümayəndəlik əməkdaşlarının və işləməyən əhalinin fövqəladə hallarla bağlı davranış qaydaları və mülki müdafiə sahəsində biliklərinin artırılması, baş verə biləcək texnogen xarakterli hadisələrin qarşısının alınması üçün profilaktik tədbirlərin görülməsinə nail olmaq məqsədilə təşkil edilib.

Toplantıda fövqəladə halların təsnifatı, o cümlədən yanğınlar, zəlzələ, torpaq sürüşməsi, sel və daşqınlar və ölkəmiz üçün xarakterik olan digər fövqəladə hadisələrlə bağlı geniş məlumat verilib, bu hadisələr zamanı zəruri davranış qaydaları barədə ətraflı danışılıb. Bundan əlavə, FHN-in “112” qaynar telefon xəttinin təyinatı izah olunub, ilkin yanğınsöndürmə vasitələrindən istifadə üsulları əyani şəkildə nümayiş etdirilib.

Tədbirdə iştirakçıların sualları cavablandırılıb, müzakirələr aparılıb.