Fövqəladə Hallar Nazirliyinin Dövlət Yanğından Mühafizə Xidməti 28 sentyabr 2016-cı il tarixində SOCAR-ın Qaz Emalı Zavodunun Könüllü Yanğından Mühafizə Dəstəsinin üzvləri üçün “Neft sənayesinin yanğın təhlükəsizliyi: ərazi, bina və avadanlıqlara olan tələblər” mövzusunda tədbir keçirmişdir.

Tədbirdə neft sənayesi müəssisələrində ərazinin saxlanma xüsusiyyətləri, o cümlədən yollar, yanğın təhlükəsizliyi tələblərinə uyğun aralıq məsafələr, binalara, su mənbələrinə və digər obyektlərə keçid yollarla bağlı tələblər, maddə və materialların saxlanılması, nəqliyyat vasitələrinin müəssisə ərazisinə buraxılması, yanğınsöndürmə və yanğın rabitə siqnalizasiya vasitələrinin istismarı qaydaları haqqında söhbət açılmış, istehsalat və inzibati binalara, otaqlara və avadanlıqlara olan yanğın təhlükəsizliyi tələbləri və yanğın zamanı zəruri tədbirlər haqqında məlumat verilmişdir.

Könüllü Mühafizə Dəstəsinin üzvlərinə ilkin yanğınsöndürmə vasitələri, onların təsnifatı, tətbiq olunma qaydaları haqqında da məlumat verilmiş, odsöndürənlərdən istifadə etmək vərdişlərini aşılamaq üçün məşqlər keçirilmiş, dəstə üzvlərinin ilkin yanğınsöndürmə vasitələrindən istifadə etmək bacarıqları yoxlanılmışdır.