21 aprel 2012-ci il tarixində Fövqəladə Hallar Nazirliyinin təşkilatçılığı və Təhsil, Gənclər və İdman nazirliklərinin dəstəyi ilə “Gənc xilasedici və yanğınsöndürən” zona yarışları keçirilmişdir.

Yarış orta ümumtəhsil müəssisələrinin şagirdləri arasında fövqəladə hallara hazırlıq sahəsində fiziki və intellektual müsabiqələrdən ibarət olmuşdur.

Yarışın keçirilməsində əsas məqsəd məktəblilərin fövqəladə hallara hazırlıq səviyyəsinin yüksəldilməsi, onlara şəxsi və ictimai təhlükəsizliyə məsuliyyətli yanaşma hissini, gənc nəslə hərbi vətənpərvərlik ruhunun aşılanması və məktəblilər arasında sağlam həyat tərzinin təbliğindən ibarət olmuşdur.

İlk zona yarışlarına Bakı və Sumqayıt şəhərlərində start verilmiş və Bakı şəhərinin 11 rayonu, Sumqayıt şəhərinin 5 rayonu üzrə yarışlar keçirilmişdir. Baki şəhəri üzrə birinci yeri Səbail rayonu 190 saylı, ikinci yeri Yasamal rayonu 158 saylı, üçüncü yeri Nəsimi rayon Bakı Slavyan Universiteti nəzdində məktəb lisey tutmuşdur.

Sumqayıt şəhərində keçirilən yarışda birinci yeri Şuşa şəhəri 10 saylı tam orta məktəbi, ikinci yeri Sumqayıt Təfəkkür liseyi, üçüncü yeri Abşeron rayonu, Novxanı kənd 1 saylı tam orta məktəbi tutmuşdur.

Növbəti zona yarışları Gəncə, Xaçmaz, Yevlax, Ağdam, Qəbələ, Salyan və Lənkəran şəhərlərində yerləşən nazirliyin regional mərkəzlərində keçiriləcəkdir.

Zona yarışlarında qalib gələn komandalar iyun ayında ümumrespublika final yarışlarılnda iştirak edəcəklər.