Fövqəladə Hallar Nazirliyinin Akademiyasında “Vətənə məhəbbət və qəhrəmanlıq” mövzusunda tədbir keçirilib.

Tədbirdə Akademiyanın rəhbərliyi, professor-müəllim heyəti, kursantlar, Vətən Müharibəsi Qəhrəmanı polkovnik-leytenant Anar Mirzəyev və Vətən müharibəsinin iştirakçısı Elçin Allahverdiyev iştirak ediblər.

Azərbaycan Respublikası Dövlət himninin səsləndirilməsi ilə başlanan tədbirdə ölkəmizin suverenliyi və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə açan FHN Akademiyasının rəis müavini polkovnik Aslan Hüseynov bildirib ki, 27 sentyabr 2020-ci ildə işğalçı Ermənistanın növbəti təxribatına cavab olaraq şanlı Azərbaycan Ordusu 44 günlük Zəfər yürüşü ilə ölkəmizin ərazi bütövlüyünü bərpa etdi. Silahlı Qüvvələrimiz torpaqlarımızın düşməndən təmizlənməsi uğrunda rəşadətlə mübarizə apardı, böyük tarixi Qələbəyə imza atdı. Torpaqlarımızın qəhrəman şəhidlərimizin, əsgər və zabitlərimizin, qazilərimizin qanı və canı bahasına işğaldan azad edildiyini vurğulayan rəis müavini Azərbaycan Respublikasının Prezidenti, Müzəffər Ali Baş Komandan cənab İlham Əliyevin müdrik rəhbərliyi altında rəşadətli Ordumuzun 44 günlük Vətən müharibəsində qazandığı tarixi Zəfərin daha qüdrətli Azərbaycan üçün möhkəm bünövrə olduğunu bildirib.

Tədbirdə iştirak edən Vətən Müharibəsi Qəhrəmanı Anar Mirzəyev Azərbaycan tarixinə qızıl hərflərlə həkk olunan möhtəşəm Qələbənin əldə edilməsində pay sahibi olduqları üçün qürur duyduqlarını bildirib, keçdiyi döyüş yolundan danışıb, müharibə xatirələrindən söz açıb.

Tədbirin sonunda vətənpərvərlik mövzusunda bədii hissə təqdim olunub.