Fövqəladə hallarla bağlı davranış qaydaları

Terror hadisəsinin qurbanı olmamaq üçün:

- xüsusilə insanların kütləvi toplaşdığı yerlərdə ayıq-sayıq olun, ətrafınızda cərəyan edən hadisələrə diqqətlə yanaşın;

- hər hansı sahibsiz əşya, şübhəli davranan insan gördükdə “102” və ya “112” qaynar xəttinə məlumat verin;

- nədənsə şübhələnirsinizsə, ərazini tərk edin;

- zahirən təhlükəli təsir bağışlayan poçt bağlamalarını qəbul etməyin;

- terror hadisəsinin planlaşdırılması haqqında telefonla xəbərdar edildikdə:

- mümkündürsə, zəng olunan nömrəni qeyd edin;

- zəng edəndən bacardıqca çox informasiya almağa çalışın;

- sizə deyilənləri dəqiqliklə yadda saxlayın;

- “102” və ya “112” qaynar xəttinə məlumat verin.

Partlayıcı qurğu təhlükəsi:

- partlayıcı qurğunun əlamətləri: dartılmış məftil, izolyasiya lenti, məxsusi səsin eşidilməsi, kiçik antena, maşının altından uzanan məftil, nəzarətsiz qalmış çanta, qutu, bağlama və s.;

- şübhəli əşya ilə rastlaşdıqda ondan uzaq durun, dərhal “102” və ya “112” qaynar xəttinə məlumat verin və ətrafdakı insanları xəbərdar edin;

- şübhəli əşya yaxınlığında radioqurğu və mobil telefondan istifadə etməyin;

- Yadda saxlayın: partlayıcı qurğunu zərərsizləşdirmək yalnız mütəxəssislərin işidir. Heç bir halda belə bir qurğuya toxunmayın və onu hər hansı formada zərərsizləşdirməyə çalışmayın.

Real partlayış təhlükəsi zamanı nə etməli:

- mümkün olduğu qədər partlayıcı qurğudan uzaqlaşın, yerə uzanın və başınızı əllərinizlə qoruyun. Bu zaman ayaqlarınız partlayıcı qurğu tərəfə uzanmalıdır;

- qəlpələrdən qorunmaq üçün hər hansı daş və ya beton maneənin arxasında gizlənin. Bunun üçün heç bir halda plastmas, şüşə və taxtadan olan maneələri, reklam şitlərini seçməyin;

- partlayış dalğasının keçdiyini hiss etdikdən dərhal sonra ayağa qalxmayın.

Terror hadisəsinə məruz qaldıqda:

- mümkün qədər hadisə yerindən uzaqlaşmağa çalışın, “102” və ya “112” qaynar xəttinə məlumat verin;

- əlaqədar qurumların təlimatlarına əməl edin;

- təcili təxliyyəyə hazır olun;

- sürətlə hərəkət edən izdihamın içində yıxılmamağa çalışın, insan axınının sizi aparmasına imkan verin;

- yaralanmısınızsa, əl altında olan parça materialı ilə (dəsmal, şərf, paltar və s.) yaranızı sarımağa və qanaxmanı dayandırmağa çalışın;

- dağıntılar altında qalmısınızsa, səs və tıqqıltı ilə diqqəti cəlb etməyə çalışın və uçqun əmələ gətirməmək üçün ehtiyatla hərəkət edin;

- ətrafda qəribə qoxu hiss edirsinizsə, yaxud boğulursunuzsa, ağız və burnunuzu çoxqatlı nəm parça materialı ilə (dəsmal, şərf, paltar və s.) tutaraq nəfəs alın;

- uşaqlara, ahıllara və köməyə ehtiyacı olan digər insanlara yardım edin.

Əgər sizi girov götürüblərsə:

- özünüzü ələ alın, təşvişə düşməyin və sakitliyinizi qoruyun. Əmin olun, əlaqədar qurumların əməkdaşları sizi xilas etməyə çalışırlar;

- sizi girov götürənlə münaqişəyə girməyin, xüsusilə ilk saatlarda onların bütün göstərişlərinə əməl edin;

- davranışınızla diqqət cəlb etməyin, fəal müqavimət göstərməyin;

- qaçmaqla qurtula biləcəyinizə əmin deyilsinizsə, buna cəhd etməyin;

- yaralanmısınızsa, az hərəkət edin;

- yeməkdən imtina etməyin. Bu, sizə gücünüzü və sağlamlığınızı qorumağa kömək edər;

- qapı və pəncərədən, eləcə də terrorçudan uzaq durun. Xilasetmə tədbirləri zamanı bu, sizin təhlükəsizliyiniz üçün vacibdir. Əgər atışma baş verərsə, üzü üstə yerə uzanın və başınızı iki əlinizlə qoruyun;

- xilas olunduqdan sonra düşünülməmiş bəyanatlar verməyin.