ENG     27 Iyun 2019 -ci il
 
  Aktual
  Xəbərlər
  Cəmiyyət
  Maarifləndirmə
  Hadisə
  Müxtəlif
  Arxiv
21 Iyun 2019-ci il
N 22 (620)

Əlaqə
Redaksiyanın ünvanı:
.......................................
Bakı şəhəri, Əliyar Əliyev küçəsi 3
.......................................
Tel.: 566 86 70
Faks: 566 86 71
566 86 74
566 86 79






  Baş səhifə / Xəbərlər
Xəbərlər
21 Iyun 2019Fövqəladə Hallar Nazirliyində Türkiyə Respublikasının Azərbaycandakı hərbi attaşesi ilə görüş keçirilib
21 Iyun 2019FHN Dövlət Material Ehtiyatları Agentliyi Dövlət Taxıl Fondu üçün 2019-cu ildə ölkədə istehsal olunmuş yüksək keyfiyyətli ərzaqlıq buğdanın tədarükünü ELAN edir
21 Iyun 2019 Fövqəladə Hallar Nazirliyinin qurumlarında və regional mərkəzlərində 15 İyun - Milli Qurtuluş Günü qeyd edilib
21 Iyun 2019 Mehmanxanalarda ilkin odsöndürmə vasitələrindən istifadə qaydası əyani şəkildə göstərilib
21 Iyun 2019 Mülki müdafiə qoşunlarının komandanlığında "Narkomanlığın cəmiyyətə və insan sağlamlığına ziyanı" mövzusunda konfrans keçirilib
21 Iyun 2019 FHN-in Dövlət Yanğından Mühafizə Xidməti Heydər Əliyev adına İdman - Konsert Kompleksində təlim keçirib
21 Iyun 2019 Ən yaxşı xilasetmə növbəsi və xilasedici müəyyənləşib
21 Iyun 2019 Kiçikhəcmli gəmilərin təhlükəsiz istismar qaydaları barədə ətraflı məlumat verilib
21 Iyun 2019 Maarifləndirmə tədbirləri davam etdirilir
21 Iyun 2019Fövqəladə Hallar Nazirliyinin İdman-sağlamlıq klubunda karate üzrə birincilik və seminar keçirilib
21 Iyun 2019 Fövqəladə hadisələrin nəticələrinin aradan qaldırılması zamanı mülki müdafiə qüvvələrinin idarə olunmasının təşkili məsələləri diqqət mərkəzində saxlanılıb
21 Iyun 2019 Gəncə Dövlət Universitetində "Əhalinin fövqəladə hallar zamanı mühafizəsinin təşkili" mövzusunda nümunəvi dərs təşkil olunub
21 Iyun 2019 Səhiyyə işçilərinə fövqəladə hallarla bağlı davranış qaydaları izah edilib

Fövqəladə Hallar Nazirliyində Türkiyə Respublikasının Azərbaycandakı hərbi attaşesi ilə görüş keçirilib

İyunun 19-da Azərbaycan Respublikası Fövqəladə Hallar Nazirliyində nazir müavini general-leytenant Etibar Mirzəyevlə Türkiyə Respublikasının Azərbaycandakı hərbi attaşesi briqada generalı İsmail Hakkı Kosealı arasında görüş keçirilib. Görüşdə attaşenin köməkçisi III dərəcəli kapitan Sabri Kamçılı və FHN-in məsul əməkdaşları  iştirak ediblər.

Görüş zamanı fövqəladə hallar sahəsində qarşılıqlı fəaliyyət istiqamətlərindən və mövcud əməkdaşlıq əlaqələrinin inkişaf etdirilməsinin əhəmiyyətindən danışılıb.

Görüşdə, həmçinin gələcəkdə Fövqəladə Hallar Nazirliyinin əməkdaşlarının Türkiyə Silahlı Qüvvələri tərəfindən təşkil olunan aidiyyəti kurslarda iştirakı, eləcə də digər qarşılıqlı maraq doğuran məsələlər müzakirə olunub, gələcək əməkdaşlığın perspektivlərinə dair fikir mübadiləsi aparılıb.

 



FHN Dövlət Material Ehtiyatları Agentliyi Dövlət Taxıl Fondu üçün 2019-cu ildə ölkədə istehsal olunmuş yüksək keyfiyyətli ərzaqlıq buğdanın tədarükünü ELAN edir

Azərbaycan Respublikası Fövqəladə Hallar Nazirliyinin Dövlət Material Ehtiyatları Agentliyi Dövlət Taxıl Fondu üçün “Səngəçal Taxıl Elevatoru”, “Gəncə Taxıl Elevatoru”, “Abşeron Taxıl” MMC, “Dəvəçi-Dəyirman MMC”, “Karat-Holdinq”, “Karmen MMC”, “Gəncə-Dəyirman” MMC, “N.Quliyev adına Bakı-Taxıl” ASC, “Muğan” ASC “Aveta” MMC, “Karat-Holdinq” MMC-nin Şəki bölməsi, “Xaçmaz-Taxıl” MMC, “Xırman” MMC, “AZAQROTAXIL” MMC, “Sarı Sünbül” firması, “Azəri-Arapoğlu” US T.LTD BM və “SAF Ekspress Aqro” MMC müəssisələri vasitəsilə cari ilin iyun ayının 20-dən sentyabr ayının 1-nə kimi “Azərbaycan Respublikasında minimum istehlak səbətinin tərkibinə daxil olan ərzaq məhsullarının qiymətinin dəyişməsi ilə bağlı operativ tədbirlərin həyata keçirilməsi haqqında” Azərbaycan Respublikasının İqtisadiyyat və Kənd Təsərrüfatı nazirlikləri və Dövlət Gömrük Komitəsi arasında bağlanmış Razılaşmaya əsasən İqtisadiyyat Nazirliyində yaradılmış İşçi Qrupu üzvlərinin təkliflərinə əsasən yerli buğda istehsalçılarından qiyməti bir ton üçün 300 AZN olmaqla (taxıl bazarının konyunkturuna müvafiq olaraq qiymət dəyişə bilər), Azərbaycan Respublikası Nazirlər Kabinetinin 7 iyul 2009-cu il tarixli 105 nömrəli Qərarı ilə təsdiq edilmiş “Dövlət Taxıl Fondunun saxlanması və istifadəsi Qaydaları”nın 1 nömrəli əlavəsi ilə müəyyən edilmiş Dövlət Taxıl Fonduna tədarük olunan taxıl üçün qəbul edilmiş aşağıdakı keyfiyyət göstəricilərinə cavab verən buğda qəbul edəcəkdir:

I. Dənin naturası (bir litrlik purkalarda qramla):

  • buğda üçün – 750 q/l-dən az olmamaqla

II. Alaq otları (zibil) qarışığı (faizlə)

  • buğda üçün – 2 faizdən çox olmamaqla

III. Dən qarışığı (faizlə):

  • buğda üçün – 5 faizdən çox olmamaqla

IV. Nəmlik (faizlə):

  • bütün bitkilər üçün – 13,0 faizdən çox olmamaqla

V. Yapışqanlıq:

  • 3-cü sinif buğda üçün – 23 faizdən az olmamaqla
  • yapışqanlığın keyfiyyəti – 2-ci qrupdan aşağı olmamaqla (göstərici: 65-75)

VI.  Şüşəvarilik:

  • 3-cü sinif buğda üçün – 40% -dən az olmamaqla

VII.  İyi və dad – bütün bitkilər üfunət, səməni, acıyovşan və ya dənli bitkilərə xas olmayan və onların emalı məhsullarına keçən (kerosin, benzin, sarımsaq və buna oxşar maddələr) digər iy və dad – yol verilmir                        

VIII.  Sürmə ilə sirayətlənmiş dənlər  yol verilmir

IX. Anbar ziyanvericiləri  ilə sirayətlənmə - yol verilmir                                                                  

X.  Digər əlamətlər – bütün bitkilər üçün karantin və iqtisadi cəhətdən təhlükəli xəstəlik, zərərverici və alaq otlarının toxumları olan dən (heyvanların yoluxucu və ya tarlada qışlayan xəstəliklərlə sirayətlənmiş, tərkibi toksiki elementlər, radionukleidlər, pestisidlərlə çirklənmiş dənlər, həmçinin ekoloji baxımdan əlverişsiz təsərrüfatlarda becərilmiş məhsul) – yol verilmir

Bildiririk ki, bu keyfiyyət göstəricilərinin tələblərinə cavab verməyən və məhsulun keyfiyyət göstəriciləri barədə akkreditə olunmuş laboratoriyadan sertifikatı olmayan buğda məhsulu qəbul edilməyəcəkdir. Taxılın özüboşaldan yük maşınları ilə gətirilməsi tövsiyə edilir.

Əlaqə telefonları və qəbul məntəqələrinin ünvanları (9:00 -dan 18:00 -a kimi):

  • “Gəncə Taxıl Elevatoru”: Gəncə şəhəri, Azərbaycan əsgəri küçəsi-20, tel: 050-660-39-03;
  • “Səngəçal Taxıl Elevatoru”: Qaradağ rayonu, Səngəçal qəsəbəsi, Bakı-Salyan şossesinin 51-ci kilometrliyi, tel: 050-218-30-06;
  • “Abşeron Taxıl” MMC: Abşeron rayonu, Xırdalan şəhəri, Samaxı şossesi, tel:  012-342-90-04; 050-488-88-80;
  • “Dəvəçi-Dəyirman MMC”: Şabran şəhəri, Nizami küçəsi-1, tel: 050-314-39-21;                                        
  • “Karat-Holdinq”: Xirdalan şəhəri,  Samaxı şossesi-23,  tel: 050-222-38-36;
  • “Karmen”  MMC: Abşeron rayonu, Yeni  Samaxı şossesi-23,  tel: 050-265-80-75;                        
  • “Gəncə-Dəyirman” MMC: Gəncə şəhəri, Kimyaçılar küçəsi-1, tel: 050-320-64-54;
  • “N.Quliyev adına Bakı-Taxıl” ASC: Dərnəgül qəsəbəsi, 2096-cı məhəllə. tel: 012-566-00-44; 050-214-72-81;
  • “Muğan” ASC “, Bakı şəhəri, Əli bəy Hüseynzadə küç., tel: 012-596-50-74, 012- 497-43-58, 050-322-12-75;
  • “Aveta” MMC: Kürdəmir şəhəri, Bakı pospekti 6, tel: 0-50-200-11-87;
  • “Karat-Holdinq” MMC-nin Şəki bölməsi, tel: 050-613-53-69; 
  • “Xaçmaz-Taxıl” MMC: Xaçmaz şəhəri, tel: 050-590-18-36;
  • “Xırman” MMC: Biləcəri qəsəbəsi, tel: 077-270-97-20;
  • “SAF Ekspress Aqro” MMC: Xırdalan şəhəri, tel: 050-630-65-92;
  • “Azəri-Arapoğlu” US və T.LTD BM, Gəncə şəhəri, tel:  050 222 65 22;
  • “Azaqrotaxıl” MMC, Ağcabədi rayonu, Hindarxı kəndi, tel: 050-255-49-55;
  • “Sarı Sünbül” firması, Giləzi, tel: 050-212-29-66.

Daxili malgöndərənlərdən tədarük edilən taxılın qəbulu üçün tələb edilən sənədlər:

  • Dənin keyfiyyət göstəricilərinə görə verilmiş uyğunluq sertifikatının surəti. Uyğunluq sertifikatı könüllülük prinsipi əsasında təqdim edilə bilər. 1 iyul 2018-ci il tarixindən buğda məhsulu istehsalçılarının qeydiyyata alınmaları üçün Qida Təhlükəsizliyi Agentliyinə müraciət etmələri tövsiyə edilir;
  • Azərbaycan Respublikasının Qida Təhlükəsizliyi Agentliyi tərəfindən verilmiş daxili karantin sertifikatı.

Əlavə məlumat almaq üçün Fövqəladə Hallar Nazirliyinin 012-512-50-25  və 070-271-71-33 telefon nömrələrinə, habelə “112” qaynar xəttinə müraciət etmək olar.



Fövqəladə Hallar Nazirliyinin qurumlarında və regional mərkəzlərində 15 İyun - Milli Qurtuluş Günü qeyd edilib

Fövqəladə Hallar Nazirliyinin Akademiyasında 15 İyun - Milli Qurtuluş Günü münasibətilə "Heydər Əliyev məktəbinin lektoriyası"nın növbəti məşğələsi keçirilib. Lektoriyanın qonağı Milli Məclisin deputatı, siyasi elmlər doktoru, professor Elman Nəsirov olub.

Əvvəlcə, tədbir iştirakçıları Akademiyanın həyətində ümummilli lider Heydər Əliyevin xatirəsinə ucaldılmış abidənin önünə gül dəstələri qoyaraq Dahi Rəhbərin əziz xatirəsini ehtiramla yad ediblər.

Dövlət himninin səsləndirilməsi ilə başlanan tədbirdə çıxış edən Fövqəladə Hallar Nazirliyinin Akademiyasının rəisi general-mayor Baba Salayev Ulu Öndərin Azərbaycan dövləti və xalqı qarşısındakı əvəzsiz xidmətlərindən danışaraq bildirib ki, Azərbaycanın çağdaş tarixi dahi siyasətçi, görkəmli dövlət xadimi Heydər Əliyevin adı və fəaliyyəti ilə bağlıdır. 15 iyun 1993-cü il müasir tariximizə böyük qayıdış, Milli Qurtuluş Günü kimi yazılıb. 1993-cü ilin yayında Azərbaycan "olum, ya ölüm" dilemması qarşısında qalanda xalqımız son ümid yeri kimi öz dahi oğlu Heydər Əliyevə müraciət edib. Ulu Öndərin yenidən hakimiyyətə qayıdışı Azərbaycanı bütün təhlükələrdən xilas etdi, xalqın istək və arzularını, onun dövlətçilik ənənələrini, milli maraq və mənafelərini müstəqillik ideyası əsasında birləşdirib. Onun qətiyyəti və dəmir iradəsi sayəsində müstəqilliyimiz qorunub saxlanılıb, əbədi prosesə çevrilib. Ümummilli lider Heydər Əliyev ömrünün bütün qalan hissəsini müstəqilliyimizin möhkəmləndirilməsinə sərf edib. Ölkəmizin bugünkü sürətli inkişafı, uğurları məhz Milli Qurtuluşun bəhrəsidir.

Akademiyanın rəisi çıxışına davam edərək bildirib ki, bu gün Azərbaycan Prezident İlham Əliyevin rəhbərliyi altında aydın bir yolla öz parlaq sabahlarına doğru addımlayır və bu yol ümummilli lider Heydər Əliyevin dahi uzaqgörənliklə müəyyən etdiyi bir yoldur.

Tədbirdə çıxış edən Milli Məclisin deputatı Elman Nəsirov ulu öndər Heydər Əliyevin həyat və fəaliyyətindən, xalqın təkidli tələbi ilə ikinci dəfə hakimiyyətə qayıdışından, Azərbaycanın müstəqilliyinin qorunub saxlanılması, xalqımızın xöşbəxt gələcəyi naminə Dahi Şəxsiyyətin misilsiz xidmətlərindən, həyata keçirdiyi siyasi-iqtisadi islahatlardan bəhs edib.

Elman Nəsirov Ulu Öndərin mütərəqqi siyasi xəttini müvəffəqiyyətlə həyata keçirən, onun layiqli davamçısı ölkə Prezidenti İlham Əliyevin respublikamızın davamlı inkişafı yolunda gördüyü misilsiz xidmətlərindən söhbət açaraq, onun yürütdüyü uğurlu daxili və xarici siyasət nəticəsində ölkəmizin dünya ölkələri arasında nüfuzunun günbəgün artdığını qeyd edib.

*****

Fövqəladə Hallar Nazirliyinin qurumları və regional mərkəzlərində 15 İyun - Milli Qurtuluş Günü münasibətilə keçirilən tədbirlərdə əvvəlcə, Azərbaycan Respublikasının Dövlət himni səsləndirilib, ümummilli lider Heydər Əliyevin əziz xatirəsi bir dəqiqəlik sükutla yad edilib.

Bayram tədbirlərində 1992-1993-cü illərdə baş vermiş hadisələrlə bağlı ətraflı məlumat verilib, ulu öndər Heydər Əliyevin Azərbaycan xalqının qarşısındakı misilsiz xidmətləri xüsusi qeyd olunub. Bildirilib ki, 1993-cü ilin iyun ayında xalqın təkidli tələbi ilə Naxçıvandan Bakıya gələn Dahi Rəhbər Azərbaycanı parçalanmaq təhlükəsindən xilas edib, ölkəmizi vətəndaş müharibəsindən qurtararaq müstəqilliyimizi qoruyub və möhkəmləndirib. Məhz onun müdrik siyasətinin Prezident İlham Əliyev tərəfindən uğurla davam etdirilməsi nəticəsində dövlətimiz dünya birliyinin nüfuzlu üzvünə, regionun liderinə çevrilib.

Çıxışlardan sonra Heydər Əliyevin həyat və fəaliyyətinə həsr olunmuş sənədli film nümayiş etdirilib.

 

 



Mehmanxanalarda ilkin odsöndürmə vasitələrindən istifadə qaydası əyani şəkildə göstərilib

FHN-in Dövlət Yanğın Nəzarəti Xidməti Qax rayonu, İlisu kəndində yerləşən "Səngər Qala" və Zaqatala şəhəri, Faiq Əmirov küçəsində yerləşən "İS" mehmanxanalarında maarifləndirmə tədbirləri keçirib.

Mehmanxanaların yanğın təhlükəsizliyi barədə geniş söhbət aparılıb, suallar cavablandırılıb. Həmçinin ilkin odsöndürmə vasitələrindən istifadə qaydası əyani şəkildə göstərilib, "Vətəndaşların nəzərinə", "Yanğın zamanı davranış qaydaları" mövzusunda yaddaş vərəqələri tədbir iştirakçılarına paylanıb, "Mehmanxanaların yanğın təhlükəsizliyi" adlı yaddaş kitabçası rəhbərliyə təqdim edilib.

 

 



Mülki müdafiə qoşunlarının komandanlığında "Narkomanlığın cəmiyyətə və insan sağlamlığına ziyanı" mövzusunda konfrans keçirilib

İyunun 18-də Fövqəladə Hallar Nazirliyi Mülki müdafiə qoşunlarının komandanlığında "Narkomanlığın cəmiyyətə və insan saglamlığına ziyanı" mövzusunda konfrans keçirilib.

Azərbaycan Respublikasının Prezidenti İlham Əliyevin 2013-cü il 24 iyun tarixli Sərəncamı ilə təsdiq edilmiş "Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizə  Dövlət Proqramı"nın icrası məqsədilə keçirilən tədbirdə polkovnik-leytenant Zabil Əliyev, polis polkovnik-leytenantı Vüsal Rüstəmov, həkim-narkoloq Zamin Əliyev  və digərləri çıxış edərək ölkəmizdə narkomanlığa və narkotik vasitələrin qanunsuz dövriyyəsinə qarşı mübarizə istiqamətində görülən işlərdən, ölkədə bu məsələyə dövlət səviyyəsində göstərilən diqqət və qayğıdan danışıblar.

 Bəşəriyyətin ən böyük bəlalarından olan narkotiklərin qanunsuz dövriyyəsi və narkomanlıq, onun acı nəticələri, fəsadları, insan sağlamlığına ziyanı haqda fikirlərini bölüşən natiqlər, bu gün bütün dünyada bəşəri bəla olan narkomaniyaya, narkotik vasitələrin qanunsuz dövriyyəsinə qarşı mübarizənin hər bir ölkə üçün prioritet olduğunu, bu problemin insan cəmiyyətinin mənəvi və əxlaqi dəyərlərinə böyük zərbə vurmaqla bərabər, sosial-iqtisadi inkişafa mənfi təsir göstərən, insanların həyat və sağlamlığına ciddi təhlükə yaradan, cinayətkarlığın artmasına səbəb olan amillərdən biri olduğunu xüsusilə vurğulayıblar. Həmçinin qeyd edilib ki, dünya dövlətləri narkotiklərin qanunsuz dövriyyəsinə qarşı mübarizə üsullarını və narkomanlığın müalicəsi metodlarını daha da təkmilləşdirmək sahəsində səylərini durmadan artırırlar.   

Bildirilib ki, Mülki müdafiə qoşunlarının hərbi hissələrinin şəxsi heyəti ilə mütəmadi olaraq narkomanlığın cəmiyyətə və insan sağlamlığına ziyanı barədə söhbətlər aparılır, mühazirə və disputlar keçirilir. Habelə, "Narkomaniya və psixotrop maddələrin qəbulu, ona meyillilik ictimai-siyasi və döyüş hazırlığını zəiflədən amillərdəndir", "Narkomaniyaya yox deyirik", "Narkotik cinayətkarlığın cəmiyyətdə təzahürləri və onlara qarşı mübarizənin aparılması yolları", "Narkomaniya cəmiyyətin qəddar düşmənidir","Narkomaniyaya qarşı mübarizə və sağlam həyat" mövzularında məşğələlər, 26 iyun BMT-nin "Narkotiklərlə Mübarizə günü" ilə əlaqədar aidiyyatı qurumlarla birgə maarifləndirici tədbirlər keçiriləcəkdir.

FHN-in Mülki müdafiə qoşunlarının

Şəxsi heyətlə iş üzrə şöbəsi



FHN-in Dövlət Yanğından Mühafizə Xidməti Heydər Əliyev adına İdman - Konsert Kompleksində təlim keçirib

Fövqəladə Hallar Nazirliyinin Dövlət Yanğından Mühafizə Xidməti iyunun 19-da  Heydər Əliyev adına İdman - Konsert Kompleksində "Tamaşa müəssisələrində yanğınların söndürülməsi" mövzusunda yanğın-taktiki təlimi keçirib.

Təlim insanların kütləvi toplaşdığı yerlərdə, o cümlədən idman və mədəniyyət müəssisələrində yanğın baş verdikdə texniki heyətin hərəkətlərini, obyekt rəhbərliyinin fəaliyyətini, yanğın zamanı birinci və sonrakı yanğınsöndürmə rəhbəri tərəfindən  yanğın yerində kəşfiyyatın aparılmasını, yanğında vəziyyətin qiymətləndirilməsini, döyüş hərəkətlərinin həlledici istiqamətlərə yönəldilməsini, yanğın  yerinə   gələnə  qədər texnikanın qarşılanmasını, yerləşdirilməsini və onların idarə olunmasını,  yanğın zamanı rabitə və arxa sahənin təşkilini, döyüş əməliyyatları zamanı texniki təhlükəsizlik qaydalarına riayət olunmasını məşq etdirmək məqsədilə keçirilib.

Təlimdən əvvəl Heydər Əliyev adına İdman -Konsert kompleksinin əməliyyat-taktiki xüsusiyyətlərinin, mövcud rabitə vasitələrinin, su təchizatının öyrənilməsi, bu tip obyektlərdə baş vermiş yanğınların söndürülməsi taktikasının təhlili, cəlb edilən qüvvə və vasitələrin təyini, şəxsi heyətin  hazırlığı və təlimin maddi-texniki təchizatının təmin olunması ilə bağlı zəruri tədbirlər həyata keçirilib. Həmçinin obyektin texnoloji xüsusiyyətləri, mühafizə olunan bina və tikililərdəki tikinti konstruksiyalarının yanğın təhlükəliliyi və digər mühüm əhəmiyyətli xüsusiyyətləri öyrənilib.

Tədbirdən öncə yanğın avtomobillərinin texniki silahlarla komplektləşdirilməsi, onların sazlığı və istismar zamanı etibarlılığı yoxlanılıb, zəruri olan digər hazırlıq işləri görülüb.

Təlim zamanı kompleksin zirzəmisində şərti yanğının söndürülməsi üçün müəyyənləşdirilmiş plan üzrə zəruri tədbirlər həyata keçirilib. 2 saylı çağırışla təlimə cəlb olunmuş Bakı şəhərinin Nəsimi, Yasamal, Binəqədi rayon yanğından mühafizə qurumlarının müvafiq qüvvə və vasitələri tərəfindən şərti yanğın  tam ləğv edilib, müvafiq xilasetmə-təxliyə işləri həyata keçirilib.

Sonda yanğın-taktiki təlim yekunlaşdırılaraq əməkdaşların yanğının  söndürülməsi zamanı fəaliyyəti müzakirə olunub, müvafiq tövsiyələr və tapşırıqlar verilib.

 

 



Ən yaxşı xilasetmə növbəsi və xilasedici müəyyənləşib

FHN-in Aran Regional Mərkəzində Xüsusi xilasetmə hissəsinin səxsi heyətinin fiziki hazırlığının, bilik və bacarıqlarının, mənəvi-psixoloji səviyyəsinin yoxlanılması məqsədi ilə  "Ən yaxşı xilasetmə növbəsi" və "Ən yaxşı xilasedici" yarışları keçirilib.

Növbələrin hər biri ayrı-ayrılıqda komissiya üzvləri tərəfindən qəbul olunub, qiymətləndirmə cədvəlinə uyğun olaraq funksional vəzifələri və Silahlı Qüvvələrin Nizamnamələri üzrə nəzəri bilikləri, praktiki vərdişləri və fiziki hazırlıqları təlimata uyğun yoxlanılıb, qaliblər müəyyənləşib.

FHN Aran Regional Mərkəzinin

Maarifləndirmə sektoru

 

 



Kiçikhəcmli gəmilərin təhlükəsiz istismar qaydaları barədə ətraflı məlumat verilib

Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidməti FHN-in Bakı Regional Mərkəzi ilə birgə paytaxtın Sabunçu rayonunun Bilgəh qəsəbəsində kiçikhəcmli gəmi istifadəçiləri üçün maarifləndirmə tədbiri keçirib.

"Kiçikhəcmli gəmilərin təhlükəsiz istismarı" mövzusunda keçirilən tədbirdə kiçikhəcmli gəmi istifadəçilərinə bu tip gəmilərin təchizat avadanlıqlarının minimum normalarının tələbləri və təhlükəsiz istismar qaydaları barədə ətraflı məlumat verilib. Həmçinin həmin gəmilərin qanunvericiliklə nəzərdə tutulmuş qaydada dövlət qeydiyyatına alınması, texniki baxışdan keçirilməsi və gəmi sürmək hüququ üçün sürücülük vəsiqələrinin alınmasının vacibliyi diqqətə çatdırılıb.

Eyni zamanda kiçikhəcmli gəmi sürücüləri naviqasiya cihazları, fərdi xilasedici vasitələr və həmin vasitələrdən istifadə qaydaları haqqında da maarifləndirilib.

Sonda tədbir iştirakçılarına maarifləndirmə xarakterli broşürlər paylanılıb.

 

 



Maarifləndirmə tədbirləri davam etdirilir

FHN-in Qarabağ Regional Mərkəzinin təşkliatçılığı, Qarabağ Regional Dövlət Yanğın Nəzarəti İdarəsi əməkdaşlarının iştirakı ilə Beyləqan rayonu 7 nömrəli Uşaq Bağçası-Körpələr Evində "Fövqəladə hallarla bağlı davranış qaydaları" mövzusunda dəyirmi masa təşkil edilib.

 Görüş müəllim, tərbiyəçi və uşaqların fövqəladə hallarla bağlı davranış qaydaları və mülki müdafiə sahəsində biliklərinin artırılmasına, bağçalarda baş verə biləcək yanğın və ya partlayış hadisələrinin qarşısının alınması məqsədi ilə təşkil edilib.

"Zəlzələ", "Əyində geyim yanarkən davranış qaydaları", "Su hövzələrində təhlükəsizlik qaydaları", "Məişətdə yanğın zamanı davranış qaydaları", "112 xidmətinə müraciət qaydaları", "Odsöndürücü balondan istifadə qaydaları" mövzularında çıxışlar edilib, iştirakçılarla uşaqların təhlükəsizliyinin təmin edilməsi barədə ətraflı söhbətlər aparılıb. Sonda videoçarxlar nümayiş etdirilib, müəssisəyə mövzulara uyğun olaraq hazırlanmış maarifləndirmə materialları paylanıb.

 Görüşdə müəssisə kollektivi ilə yanaşı, ictimaiyyət nümayəndələri və valideynlər də iştirak ediblər. 

***

Fövqəladə Hallar Nazirliyinin Muğan Regional Mərkəzi Şirvan Mənzil Təsərüffat idarəsində "Fövqəladə hallarla bağlı davranış qaydaları" mövzusunda maarifləndirmə tədbiri keçirib.

Tədbir müəssisə kollektivinə fövqəladə hallar zamanı davranış qaydalarına dair biliklərin aşılanması məqsədilə təşkil edilib.

Mərkəzin əməkdaşları toplantıda təbii və texnogen mənşəli fövqəladə hadisələr, su hövzələrində insanların təhlükəsizliyi, dəm qazından zəhərlənmənin profilaktikası, "112" qaynar xətti" və sair mövzularda məruzələrlə çıxış ediblər.

Tədbirdə mövzulara dair videoçarxlar nümayiş etdirilib, suallar cavablandırılıb.

***

Fövqəladə Hallar Nazirliyinin Şimal Regional Mərkəzi Xaçmaz Regional Mədəniyyət İdarəsində "Fövqəladə hallarla bağlı davranış və yanğın təhlükəsizliyi qaydaları" mövzusunda seminar- müşavirə keçirib.

Tədbirdə müxtəlif xarakterli fövqəladə halların yaranma səbəbləri, mülki müdafiə işinin təşkili, su hövzələrində təhlükəsizlik, məişətdə qazdan təhlükəsiz istifadə, ildırım, sel və daşqın zamanı hərəkət qaydaları və elektrikdən istifadə zamanı təhlükəsizlik tədbirlərinə dair məruzələr edilib, müzakirələr aparılıb.

Seminar-müşavirədə həmçinin yanğın, dəm qazı, torpaq sürüşməsi zamanı təhlükəsiz davranış qaydaları, odsöndürücü balonlardan istifadə üsulları və fövqəladə hadisələrin vaxtında aradan qaldırılmasında "112" qaynar xətti"nin roluna dair məruzələr edilib.

Sonda mövzularla bağlı fotoslayd və videoçarx nümayiş olunub, suallar cavablandırılıb.



Fövqəladə Hallar Nazirliyinin İdman-sağlamlıq klubunda karate üzrə birincilik və seminar keçirilib

Fövqəladə Hallar Nazirliyinin İdman-Sağlamlıq Mərkəzinin kompleksində 15 İyun-Milli Qurtuluş Gününə həsr edilmiş Karate üzrə seminar və uşaq, yeniyetmə və gənclər arasında Xətai rayon açıq birinciliyi keçirilib. Sözügedən tədbir İdman-Sağlamlıq Mərkəzinin kompleksində ilk dəfə olaraq təşkil edilib. Seminar və birincilik Arpaçay Karate Klubunun təşkilatçılığı, Fövqəladə Hallar Nazirliyiİdman- Sağlamlıq Mərkəzinin və Xətai rayon İcra Hakimiyyətinin dəstəyi ilə keçirilib.

Yarışın ilk günündə Karate Federasiyaları Assosiasiyasının və Taekvando Federasiyasının 1-ci vitse-prezidenti, ikiqat dünya çempionu, 7-ci dan qara kəmər sahibi Füzuli Musayev tərəfindən idmançılar üçün seminar keçirilib. Seminarda 250-dən çox yeniyetmə və gənc iştirak edib.

Növbəti gün keçirilən yarışlarda isə Azərbaycan Respublikasının 11 regionundan, Bakı şəhərindən (10 komanda) və Rusiya Federasiyasından olan komandalar güclərini sınayıblar. Ümumilikdə birincilikdə 300-ə yaxın idmançı iştirak edib.

Yarışın açılış mərasimində ulu öndər Heydər Əliyevin xatirəsi və Azərbaycan Respublikasının suverenliyi və torpaqları uğrunda həyatlarını qurban vermiş şəhidlərin xatirəsi bir dəqiqəlik sükutla yad edilib. Sonra Bakı şəhəri, Xətai rayon İcra Hakimiyyətinin İctimai siyasi və humanitar məsələlər üzrə şöbəsinin müdiri Pənah İmanov açılış nitqi söyləyərək idmançıları təbrik edib, uğurlar arzulayıb. Fövqəladə Hallar Nazirliyinin İdman-Sağlamlıq Mərkəzinin və Arpaçay Karate Klubunun nümayəndələrinin nümunəvi çıxışlarından sonra birinciliyin təşkilində fəallıq göstərən şəxslər Xətai rayon İcra Hakimiyyətinin fəxri fərmanlarıya ilə təltif ediliblər. Mərkəzin rəisi polkovnik Füzuli Musayev də yarışların və seminarın təşkilinə verdiyi hərtərəfli dəstəyə görə Xətai rayon İcra Hakimiyyətinin fəxri fərmanına layiq görülüb.

Yarış qaliblərin mükafatlandırılması mərasimi ilə başa çatıb.



Fövqəladə hadisələrin nəticələrinin aradan qaldırılması zamanı mülki müdafiə qüvvələrinin idarə olunmasının təşkili məsələləri diqqət mərkəzində saxlanılıb

Fövqəladə Hallar Nazirliyinin Sumqayıt Regional Mərkəzi tərəfindən yüksək hazırlıqlı Ərazi Mülki Müdafiə qüvvələrinin iştirakı ilə Azərkimya İB-nin "Etilen-Polietilen" zavodunun inzibati binasının qarşısında "Fövqəladə hadisələrin nəticələrinin aradan qaldırılması zamanı mülki müdafiə qüvvələrinin idarə olunmasının təşkili" mövzusunda xəbərdarlıq toplanış məşqi keçirilib.

Toplanış məşqinə Sumqayıt Regional Mərkəzinin, Sumqayıt şəhər Dövlət Yanğından Mühafizə İdarəsinin, Sumqayıt şəhər Polis İdarəsinin, Sumqayıt şəhər Təcili Tibbi Yardım Stansiyasının, Şəhər Gigiyena və Epidemiologiya Mərkəzinin, Sumqayıt şəhər Qaz-qəza və Su-qəza Bərpa xidmətlərinin, Şəhər Telekommunikasiya Qovşağının aidiyyəti struktur bölmələri, "Etilen-Polietilen" zavodunun əməkdaşları, yerli icra hakimiyyəti orqanının mülki müdafiə qərargahı və ərazi mülki müdafiə qüvvələrinin şəxsi heyəti cəlb olunub.

Məşqin keçirilməsində əsas məqsəd baş verə biləcək zəlzələ, yanğın və partlayış hadisələrinin nəticələri aradan qaldırılarkən zavodun işçilərinin funksional vəzifələrini yerinə yetirmələri üzrə nəzəri bilik və praktiki vərdişlərini təkmilləşdirməkdən, fövqəladə hadisələrin qarşısının alınması işində təşkilatçılığın və operativliyin artırılmasına, şəxsi heyətin hazırlıq səviyyəsinin yüksəldilməsinə köməklik göstərməkdən ibarət olub. Məşq zamanı hərbiləşdirilməmiş ərazi mülki müdafiə dəstələrinin fövqəladə hal barədə xəbərdar edilməsi, xəbərdarlıq toplanışı siqnalı ilə qaldırılması, toplanma məntəqəsinə yürüş, toplanış və idarəetmənin təşkili üzrə fəaliyyətləri yoxlanılıb. Tədbirdə, həmçinin funksional vəzifələrlə bağlı məruzələr dinlənilib.

Sonda ərazi mülki müdafiə dəstə rəhbərlərinin iştirakı ilə məşqin təhlili aparılıb, çatışmazlıqlar diqqətə çatdırılıb, müvafiq tapşırıq və tövsiyələr verilib.

 



Gəncə Dövlət Universitetində "Əhalinin fövqəladə hallar zamanı mühafizəsinin təşkili" mövzusunda nümunəvi dərs təşkil olunub

Fövqəladə Hallar Nazirliyinin Gəncə Regional Mərkəzinin əməkdaşları tərəfindən Gəncə Dövlət Universitetində "Əhalinin fövqəladə hallar zamanı mühafizəsinin təşkili" mövzusunda nümunəvi dərs keçirilib.

Tədbirə universitetin müəllim və tələbələri cəlb olunub. Universitetin mülki müdafiə işlərinə məsul şəxsi çıxış edərək ali təhsil müəssisəsində mülki müdafiənin təşkili və idarəetmə orqanları barədə qısa məlumat verib.

Dərsdə, həmçinin "Əhalinin fövqəladə hallar zamanı mühafizəsinin təşkili" mövzusunda mühazirə oxunub, fotoslaydlar nümayiş edilib. Sonra universitetin həyətində xüsusi xilasetmə alət və avadanlıqları nümayiş olunub. Sonda mövzuya dair suallar cavablandırılıb.

 

 



Səhiyyə işçilərinə fövqəladə hallarla bağlı davranış qaydaları izah edilib

Fövqəladə Hallar Nazirliyinin Aran Regional Mərkəzi Zərdab şəhər Gigiyena və Epidemiologiya Mərkəzində "Fövqəladə hallarla bağlı davranış və yanğın təhlükəsizliyi qaydaları" mövzusunda maarifləndirmə tədbiri keçirib.

Tədbir fövqəladə hallarla bağlı davranış qaydaları və mülki müdafiəyə dair biliklərin aşılanması məqsədilə keçirilib.

Toplantıda "Fövqəladə halların təsnifatı", "Zəlzələ zamanı necə davranmalı?", "Torpaq sürüşməsi zamanı davranış qaydaları", "Məişətdə yanğın zamanı davranış qaydaları", "Odsöndürən balonlardan istifadə", "Dəm qazı" və "112" qaynar xətti" mövzularında çıxışlar edilib, mövzulara aid videoçarxlar nümayiş olunub.

Sonda maarifləndirmə xarakterli təbliğat materialları, yaddaş kitabçaları paylanılıb və suallar cavablandırılıb.

 

 



Qəzetin çap variantı




Qəzet Azərbaycan Respublikasının Ədliyyə Nazirliyində qeydiyyatdan keçmişdir. Qeydiyyat nömrəsi - 1873.
Təsisçi Azərbaycan Respublikası Fövqəladə Hallar Nazirliyi.
Bütün hüquqlar qorunur.
© 2009-cu il