ENG     24 Avqust 2019 -ci il
 
  Aktual
  Xəbərlər
  Cəmiyyət
  Maarifləndirmə
  Hadisə
  Müxtəlif
  Arxiv
23 Avqust 2019-ci il
N 28 (626)

Əlaqə
Redaksiyanın ünvanı:
.......................................
Bakı şəhəri, Əliyar Əliyev küçəsi 3
.......................................
Tel.: 566 86 70
Faks: 566 86 71
566 86 74
566 86 79






  Baş səhifə / Xəbərlər
Xəbərlər
23 Avqust 2019 "Bəzi çoxmənzilli binaların istismarına icazə verilməsinin sadələşdirilməsi haqqında" Azərbaycan Respublikası Prezidentinin Fərmanının icrası davam etdirilir
23 Avqust 2019 Gənc əsgərlərin hərbi andiçmə mərasimi
23 Avqust 2019 FHN-in Akademiyasının kursantları praktik vərdişlərini artırırlar
23 Avqust 2019 FHN Mətbuat xidmətinin məlumatı
23 Avqust 2019 İlkin yanğınsöndürmə vasitələrindən istifadə qaydaları əyani olaraq nümayiş etdirilib
23 Avqust 2019 Mədəniyyət işçilərinə fövqəladə hallarla bağlı davranış qaydaları izah edilib
23 Avqust 2019 Pambıq tədarükü və emalı zamanı yanğın təhlükəsizliyinə dair regional seminar-müşavirələr keçirilib
23 Avqust 2019 Fövqəladə halların idarə olunması sahəsində birgə fəaliyyətin gücləndirilməsi və koordinasiyanın qurulması məsələləri ətraflı müzakirə olunub
23 Avqust 2019 Yaşayış məntəqələrində əhalinin fövqəladə hallara hazırlığının gücləndirilməsi məsələləri diqqət mərkəzində saxlanılıb
23 Avqust 2019 Maarifləndirmə tədbirləri davam etdirilir
23 Avqust 2019 FHN-in əməkdaşı Avropa çempionatında bürünc medal qazanıb
23 Avqust 2019 Su hövzələrində insanların təhlükəsizliyinin təmin olunması diqqətdə saxlanılır

"Bəzi çoxmənzilli binaların istismarına icazə verilməsinin sadələşdirilməsi haqqında" Azərbaycan Respublikası Prezidentinin Fərmanının icrası davam etdirilir

Azərbaycan Respublikası Prezidentinin növbəti humanist addımı olaraq imzaladığı "Bəzi çoxmənzilli binaların istismarına icazə verilməsinin sadələşdirilməsi haqqında" 19 fevral 2019-cu il tarixli 529 nömrəli Fərmanının icrası ilə əlaqədar Fövqəladə Hallar Nazirliyi və digər aidiyyəti dövlət qurumları tərəfindən zəruri tədbirlər davam etdirilir.

Görülmüş tədbirlər nəticəsində ötən 6 ay ərzində ümumi sahəsi 2190082 kv.m olan 21911 mənzilli, ümumilikdə 359 girişli 133 binaya (kompleksə) dair müsbət rəy verilib. 129-u Bakı şəhəri, 3-ü Abşeron rayonu, 1-i isə Gəncə şəhərində yerləşən bu binalara dair sənədlər komplektləşdirilərək, müvafiq qaydada onların istismara hazır olması barədə tərtib edilmiş rəy aidiyyəti üzrə Dövlət Şəhərsalma və Arxitektura Komitəsinə, Abşeron Rayon və Gəncə Şəhər İcra hakimiyyətlərinə təqdim olunub.

Aparılmış müayinələr nəticəsində aşkar edilən çatışmazlıqların aradan qaldırılması üzrə işlərin Fərmanla müəyyən olunmuş vaxtda başa çatdırılmasının təmin edilməsi, bu istiqamətdə qarşıya çıxan məsələlərin operativ həlli üçün birgə fikir mübadiləsinin aparılması məqsədilə 30 iyul 2019-cu il tarixində Abşeron Rayon İcra Hakimiyyətinin inzibati binasında müvafiq qurumların nümayəndələrinin iştirakı ilə Abşeron rayonu ərazisində inşa edilmiş və nöqsanları aradan qaldırılmadığından Fövqəladə Hallar Nazirliyinin müvafiq rəyinin verilməsi mümkün olmamış 23 çoxmənzilli yaşayış binasının nümayəndələri ilə görüş keçirilib. Tədbirdə hər bir bina üzrə mövcud vəziyyət təhlil edilib, nöqsanların aradan qaldırılması məqsədilə görüləcək işlər və bu istiqamətdə aidiyyəti dövlət qurumları tərəfindən köməkliyin göstərilməsi imkanları müzakirə edilib.

Qeyd edək ki, Fərmandan irəli gələn məsələlərin icrası davam etdirilir və görülən işlər ölkə başçısının nəzarəti altındadır.

 

 



Gənc əsgərlərin hərbi andiçmə mərasimi

Fövqəladə Hallar Nazirliyinin Mülki müdafiə qoşunlarında gənc əsgərlərin hərbi andiçmə mərasimi keçirilib.

Andiçmə mərasimi Dövlət himninin sədaları altında Azərbaycan Respublikasının Dövlət bayrağının meydana gətirilməsi ilə başlayıb.  Bölüklər şəklində tribunanın önündə düzülən gənc əsgərlər Vətəni layiqincə qoruyacaqlarına, əsgəri borclarına sadiq qalacaqlarına, xidməti tapşırıqlara, komandirlərin əmrlərinə sözsüz əməl edəcəklərinə and içiblər.

Təntənəli mərasimdə çıxış edən hərbi hissə komandiri əlamətdar gün münasibətilə təbriklərini çatdırıb və ümidvar olduğunu  bildirib ki, gənc əsgərlər Vətənə, dövlətə və Ali Baş Komandana, hərbi anda sadiq qalacaq, nümunəvi xidməti, təlim-tərbiyəsi ilə hərbi hissənin adını yüksək tutaraq, əsgəri borcu şərəflə yerinə yetirəcək, bir xilasedici kimi baş verə biləcək fövqəladə hallar zamanı  zərərçəkmiş əhalinin  xilas edilməsi üçün əllərindən gələni əsirgəməyəcəklər.

Çıxış edən valideynlər övladlarını təbrik edərək əlamətdar günün yaratdığı xoş ovqatla ən xoş arzularını dilə gətiriblər.

Rəsmi mərasim başa çatdıqdan sonra şəxsi heyət üçün konsert proqramı təşkil olunub və gənc əsgərlərin valideynlərlə görüşü təşkil edilib.

 

 



FHN-in Akademiyasının kursantları praktik vərdişlərini artırırlar

Fövqəladə Hallar Nazirliyinin Akademiyasının Həyat fəaliyyətinin təhlükəsizliyi fakültəsinin III kurs kursantları FHN-in Bakı Regional Mərkəzində "Qrup rəisi" vəzifəsində istehsalat təcrübəsi keçiblər.

Bakı Regional Mərkəzinin fəaliyyəti, gündəlik iş rejimi, axtarış-xilasetmə və digər texniki avadanlıqlarla tanışlıq kursantların bilik və bacarıqlarının artırılması yolunda mühüm əhəmiyyət kəsb edib.

Təcrübə dövründə hər bir kursanta, onun bilik və bacarıqları nəzərə alınmaqla, fərdi yanaşma təmin edilib, onların nəzəri biliklərinin artırılması və praktik vərdişlərin qazanılması istiqamətində məqsədyönlü iş aparılıb.

Təcrübənin  ilk  günlərindən  kursantların  həvəslə  və  böyük  səylə  bu işə yanaşdıqları zabitlər tərəfindən müsbət qiymətləndirilib, bilik və bacarıqlarının  artırılması  üçün  bütün  imkanlar  səfərbər  edilib.

Kursantlar mərkəzin struktur bölmələrinin fəaliyyət istiqamətləri və görülən işlər, eləcə də müvafiq sənədlərlə yaxından tanış olub, gələcək fəaliyyətləri üçün zəruri məlumatlar alıblar. Mərkəz rəhbərliyi və təcrübə  keçən zabitlər tərəfindən verilmiş tapşırıqlar da səylə yerinə yetirilib.

Qeyd edilənlərlə yanaşı, kursantlar Regional Mərkəzin Xüsusi xilasetmə xidmətinin praktiki fəaliyyətində də yaxından iştirak ediblər. Texnikaya və avadanlıqlara qulluq zamanı iş prinsiplərini mənimsəməklə yanaşı, kursantlara onlardan düzgün istifadə qaydaları və təhlükəsiz iş prinsipi barədə ətraflı məlumat verilib.

 



FHN Mətbuat xidmətinin məlumatı

Bakı şəhəri, Nərimanov rayonu, Baksol yolu yaxınlığında tikinti materialları bazarında baş vermiş yanğın FHN-in müvafiq qüvvələri tərəfindən söndürülüb. Yanğının söndürülməsi üçün əraziyə, ümumilikdə, FHN-in Dövlət Yanğından Mühafizə Xidmətindən 34 ədəd texnika və 141 nəfər canlı qüvvə, Xüsusi Riskli Xilasetmə Xidmətindən 6 ədəd texnika və 60 nəfərdən ibarət canlı qüvvə cəlb olunub. İki nəfər yanğınsöndürən tüstüdən zəhərlənmə diaqnozu ilə xəstəxanaya yerləşdirilib, üç nəfərə isə yerində yardım göstərilib. İlkin hesablamalara görə, təxminən, 7200 kv.m. taxta məmulatları yanıb. Bitişik obyektlər yanğından mühafizə olunub. 

***

Avqustun 22-də Fövqəladə Hallar Nazirliyinin "112" qaynar telefon xəttinə daxil olmuş məlumata əsasən, Ağsu rayonu Kəndəxan kəndi yaxınlığında dağlıq ərazidə yanğın başlayıb. Yanğının söndürülməsi üçün əraziyə FHN-in Aviasiya dəstəsinin 2 ədəd helikopteri, Dövlət Yanğından Mühafizə Xidmətindən 5 ədəd texnika və 30 nəfər şəxsi heyət, Mülki müdafiə qoşunlarından 4 ədəd texnika və 41 nəfər şəxsi heyət cəlb olunub.

***

Avqustun 22-də Fövqəladə Hallar Nazirliyinin "112" qaynar telefon xəttinə Şamaxı rayonunun Meysəri kəndi yaxınlığında quru ot sahəsində yanğın baş verməsi barədə məlumat daxil olub. Yanğının söndürülməsi üçün əraziyə FHN-in Aviasiya dəstəsinin bir helikopteri, Dövlət Yanğından Mühafizə Xidmətinin 64 nəfərlik şəxsi heyəti və texnikası cəlb olunub və yanğın FHN-in müvafiq qüvvələri tərəfindən saat 17:10-da söndürülüb.

***

Avqustun 21-də Fövqəladə Hallar Nazirliyinin "112" qaynar telefon xəttinə Yardımlı rayonunun Ləzir kəndi yaxınlığında dağlıq zonada yanğın baş verməsi barədə məlumat daxil olub. Yanğının söndürülməsi üçün əraziyə FHN-in Aviasiya dəstəsinin bir helikopteri, Dövlət Yanğından Mühafizə Xidmətinin müvafiq qüvvələri cəlb olunub.

***

Hirkan Milli Parkında dağlıq zonada baş vermiş yanğının söndürülməsi üçün əraziyə FHN-in Aviasiya dəstəsinin "BE 200 ÇS" amfibiya təyyarəsi cəlb olunub. Yanğının söndürülməsi məqsədilə FHN-in Aviasiya dəstəsinin iki helikopteri də ərazidə fəaliyyətdədir.

Xatırladaq ki, avqustun 20-də Fövqəladə Hallar Nazirliyinin "112" qaynar telefon xəttinə Lənkəran rayonunun Təngivan kəndi yaxınlığında Hirkan Milli Parkının ərazisində dağlıq zonada yanğın baş verməsi barədə məlumat daxil olub.

Yanğının geniş əraziyə yayılmasının qarşısını almaq və operativ söndürülməsini təmin etmək məqsədilə hadisə yerinə Fövqəladə Hallar Nazirliyinin Aviasiya dəstəsinin, Dövlət Yanğından Mühafizə Xidmətinin, Mülki müdafiə qoşunlarının və Cənub Regional Mərkəzinin müvafiq qüvvələri, Ekologiya və Təbii Sərvətlər Nazirliyinin Meşə təsərrüfatı idarəsinin əməkdaşları və yerli sakinlər cəlb edilib. Hazırda yanğının söndürülməsi üzrə işlər davam etdirilir.

 

 



İlkin yanğınsöndürmə vasitələrindən istifadə qaydaları əyani olaraq nümayiş etdirilib

FHN-in Dövlət Yanğın Nəzarəti Xidmətinin Şimal-qərb Regional Dövlət Yanğın Nəzarəti İdarəsi Şamaxı rayon Mərkəzi Xəstəxanasında, Muğan Regional Dövlət Yanğın Nəzarəti İdarəsi Hacıqabul şəhər 1 saylı Mənzil İstismar Sahəsində, Salyan regional Qaz İstismar İdarəsinin Neftçala Xidmət Sahəsində, Şirvan şəhəri M.Ə.Rəsulzadə küçəsi 7 saylı, L.T.İbrahimov küçəsi 4 saylı, 20 Yanvar küçəsi 1, 2 və 4A saylı binaların, həmçinin Sabirabad rayon Quruzma kənd sakinləri üçün, Qarabağ Regional Dövlət Yanğın Nəzarəti İdarəsi Bərdə şəhər 4 saylı Uşaq Yaradıcılıq Mərkəzində, "Azərpoçt" MMC-nin  Bərdə şəhər filialında,  Bərdə rayon Arxiv idarəsində, Horadiz şəhər Xəstəxanasında, Ağcabədi şəhər 2, 6 saylı körpələr evi uşaq bağcalarında, Aran Regional Dövlət Yanğın Nəzarəti İdarəsi Yevlax Dövlət Aqrar İnkişaf Mərkəzində, Göyçay telekommunikasiya Qovşağında, Ucar şəhər 2 saylı və Goranboy şəhər 3 saylı Uşaq bağcalarında, Cənub Regional Dövlət Yanğın Nəzarəti İdarəsi Lənkəran rayon Gərmətük bələdiyyəsi, Girdəni kənd Uşaq bağcasında, Masallı rayon Dövlət Aqrar İnkişaf Mərkəzində, 1-ci ərazi Dövlət Yanğın Nəzarəti İdarəsi Xırdalan şəhərində yerləşən 2 saylı Poçtda yanğın təhlükəsizliyi sahəsində maarifləndirmə tədbirləri keçirib.

Toplantılarda "Səhiyyə obyektlərində yanğın təhlükəsizliyinə əməl olunması Qaydaları", "İnzibati binalar üçün yanğın təhlükəsizliyi qaydaları", "Dəm qazı təhlükəsi", "Məişətdə yanğın təhlükəsizliyi", "112" qaynar xətti"nə nə vaxt zəng etməli?", "Odsöndürənlərdən istifadə qaydası" barədə, həmçinin adıçəkilən müəssisələrdə yanğın təhlükəsizliyi qaydaları haqqında ətraflı məlumat verilib. Toplantılarda, həmçinin ərazinin daim təmiz vəziyyətdə saxlanılması, normativ sənədlərə uyğun ilkin yanğınsöndürmə vasitələri ilə təmin edilməsi, yanğın zamanı insanların binadan köçürülməsi planlarının, pilləkən qəfəslərində əlavə otaqların quraşdırılmasının yolverilməzliyi, yanğına qarşı su təchizatına - hovuzlara, kəmərlərə, çən və hidrantlara qayğı ilə yanaşılmasının vacibliyi  qeyd olunub.

Tədbirlərdə ilkin yanğınsöndürmə vasitələrindən istifadə qaydaları əyani olaraq nümayiş etdirilib, yanğına qarşı təbliğat işində istifadə olunması üçün "Vətəndaşların nəzərinə", "Yanğın zamanı davranış qaydaları" mövzularında yaddaş vərəqələri və bukletlər paylanıb.

 



Mədəniyyət işçilərinə fövqəladə hallarla bağlı davranış qaydaları izah edilib

Fövqəladə Hallar Nazirliyinin Şimal Regional Mərkəzi Xaçmaz regional mədəniyyət idarəsinin Şabran rayonu üzrə nümayəndəliyində "Fövqəladə hallarla bağlı davranış və yanğın təhlükəsizliyi qaydaları" mövzusunda seminar- müşavirə   keçirib.

Tədbirdə müxtəlif xarakterli fövqəladə halların yaranma səbəbləri, mülki müdafiə işinin təşkili, su hövzələrində təhlükəsizlik, məişətdə qazdan təhlükəsiz istifadə, ildırım, sel və daşqın zamanı hərəkət qaydaları və elektrikdən istifadə zamanı təhlükəsizlik tədbirlərinə dair məruzələr edilib, müzakirələr aparılıb.

Seminar-müşavirədə, həmçinin yanğın, dəm qazı, torpaq sürüşməsi zamanı təhlükəsiz davranış, odsöndürücü balonlardan istifadə qaydaları və fövqəladə hadisələrin vaxtında aradan qaldırılmasında "112" qaynar xətti"nin roluna dair məruzələr edilib.

Sonda mövzularla bağlı fotoslayd və videoçarx nümayiş olunub, suallar cavablandırılıb.

 

 



Pambıq tədarükü və emalı zamanı yanğın təhlükəsizliyinə dair regional seminar-müşavirələr keçirilib

Fövqəladə Hallar Nazirliyinin Dövlət Yanğın Nəzarəti Xidmətinin Gəncə, Muğan və Qarabağ Regional Dövlət Yanğın Nəzarəti idarələri pambıq tədarükü zamanı yanğın təhlükəsizliyinin təmin olunması məqsədilə Samux, Sabirabad və Bərdə şəhərlərində regional seminar-müşavirələr keçirib.

Tədbirlərdə Samux, Sabirabad və Bərdə rayon İcra Hakimiyyəti başçılarının müavinləri, icra nümayəndələri, bələdiyyə sədrləri, Kənd Təsərrüfatı İdarəsinin, Dövlət Aqrar İnkişaf Mərkəzinin, pambıq tədarükü məntəqələrinin və digər aidiyyəti qurumların nümayəndələri, həmçinin sahibkarlar iştirak ediblər.

"Pambıq tədarükü və emalı zamanı yanğın təhlükəsizliyi tələbləri" mövzusunda keçirilən regional seminar-müşavirələrdə xam pambığın yığılmasına, daşınmasına və emalına cəlb olunacaq kənd təsərrüfatı maşınlarının ilkin yanğınsöndürmə vasitələri, qığılcımsöndürənlər və süpürgələrlə təmin edilməsinin vacibliyi diqqətə çatdırılıb. Həmçinin pambıq tarlalarının, pambıqqurutma meydançalarının ərazisində və yaxınlığında tonqal qalanmasına, açıq oddan istifadə edilməsinə, siqaret çəkilməsinə icazə verilməməsinin, su mənbələrinə yollar salınmasının, hovuzların yanında avtomobillərin dönə bilməsi, manevr etməsi üçün meydançaların olmasının zəruriliyi də vurğulanıb.

 



Fövqəladə halların idarə olunması sahəsində birgə fəaliyyətin gücləndirilməsi və koordinasiyanın qurulması məsələləri ətraflı müzakirə olunub

FHN-in Şimal-qərb Regional Mərkəzi nazirliyin Baş əməliyyat idarəsi ilə birgə İsmayıllı Rayon İcra Hakimiyyətində "Fövqəladə Hallar Nazirliyi Şimal-qərb Regional Mərkəzinin əhatə etdiyi rayonların icra hakimiyyəti strukturları, özünüidarəetmə orqanları və fövqəladə hallar komissiyaları arasında fövqəladə halların idarə olunması sahəsində birgə fəaliyyətin gücləndirilməsi və koordinasiyanın qurulması" mövzusunda seminar-müşavirə keçirib.

Tədbirdə Şimal-qərb Regional-Mərkəzinin, Şimal-qərb Regional Dövlət Yanğın Nəzarəti İdarəsinin, Sənayedə işlərin təhlükəsiz görülməsi və Dağ-Mədən Nəzarəti Agentliyinin Şimal-qərb Regional Müfəttişliyinin, Tikintidə Təhlükəsizliyə Nəzarət Dövlət Agentliyinin Şimal-qərb Regional Tikinti Müfəttişliyinin, İsmayıllı rayon Dövlət Yanğından Mühafizə Hissəsinin, İsmayıllı Rayon İcra Hakimiyyətinin, Polis şöbəsinin, Təhsil şöbəsinin, Mərkəzi Rayon Xəstəxanasının, Elektrik paylayıcı şəbəkəsinin, Qaz istismar sahəsinin, Telekommunikasya qovşağının, Suvarma sistemləri idarəsinin, Meşələrin mühafizəsi və bərpası müəssisəsinin rəhbər heyəti, inzibati ərazi dairələri üzrə nümayəndələr və bələdiyyə sədrləri iştirak edib.

Seminar-müşavirədə İsmayıllı rayonu üzrə təbii və texnogen xarakterli fövqəladə halların qarşısının alınması və nəticələrinin aradan qaldırılması sahəsində nazirliyin qurumları, yerli icra hakimiyyəti və özünüidarəetmə orqanları ilə birgə qarşılıqlı fəaliyyətin təmin edilməsi, onların  qəza xilasetmə və digər təxirəsalınmaz işlərə cəlb olunması, baş vermiş və ya baş verə biləcək hadisələrlə bağlı informasiya mübadiləsinin vacibliyi vurğulanıb, qarşıda duran vəzifələr və problemlərin həlli barədə müzakirələr aparılıb.

 



Yaşayış məntəqələrində əhalinin fövqəladə hallara hazırlığının gücləndirilməsi məsələləri diqqət mərkəzində saxlanılıb

Fövqəladə Hallar Nazirliyinin Sumqayıt Regional Mərkəzi tərəfindən Sumqayıt Bələdiyyəsinin 5, 6 və 9-cu mikrorayonlar üzrə məhəllə komitələrinin nümayəndələri ilə "Yaşayış məntəqələrində əhalinin fövqəladə hallara hazırlığının gücləndirilməsi" mövzusunda maarifləndirmə tədbiri keçirilib.

Tədbirin keçirilməsində məqsəd məhəllə komitəsinin üzvlərinin fövqəladə hallarla bağlı davranış qaydaları və mülki müdafiə sahəsində biliklərinin artırılmasına, baş verə biləcək yanğın və ya partlayış hadisələrinin qarşısının alınması məqsədilə profilaktik tədbirlərin görülməsinə nail olmaqdır.

Tədbirdə FHN-in Sumqayıt Regional Mərkəzinin və Sumqayıt Regional Dövlət Yanğın Nəzarəti İdarəsinin, Sumqayıt Bələdiyyəsinin və məhəllə komitəsinin nümayəndələri iştirak ediblər.

Tədbirdə "Fövqəladə halların təsnifatı", "Zəlzələ zamanı necə davranmalı?", "Sel və daşqın zamanı nə etməli", "Məişətdə yanğın zamanı davranış qaydaları", "Odsöndürən balonlardan istifadə", "Dəm qazı", "Çimərlikdə təhlükəsizlik qaydaları"və "112 qaynar xətti" mövzularında çıxışlar edilib, mövzulara aid videoçarxlar nümayiş olunub.

Sonda mövzulara dair suallar cavablandırılıb və maarifləndirmə xarakterli təbliğat materialları, yaddaş kitabçaları, bukletlər paylanılıb.

 



Maarifləndirmə tədbirləri davam etdirilir

Fövqəladə Hallar Nazirliyinin Dövlət Yanğın Nəzarəti Xidməti növbəti maarifləndirmə tədbirini Sumqayıt şəhərinin ərazisində yerləşən "Regnum" otelində keçirib.

Tədbirdə otelin yanğın təhlükəsizliyi barədə geniş söhbət aparılıb, suallar cavablandırılıb. Həmçinin ilkin yanğınsöndürmə vasitələrindən istifadə qaydası əyani şəkildə göstərilib və Xidmət tərəfindən hazırlanmış "Vətəndaşların nəzərinə", "Yanğın zamanı davranış qaydaları" mövzusunda yaddaş vərəqələri tədbir iştirakçılarına paylanılıb, "Mehmanxanaların yanğın təhlükəsizliyi" adlı yaddaş kitabçası rəhbərliyə təqdim edilib.

***

Fövqəladə Hallar Nazirliyinin Şimal Regional Mərkəzi Qusar rayonunun Piral kənd inzibati ərazi dairəsi üzrə nümayəndəliyində "Fövqəladə hallarla bağlı davranış və yanğın təhlükəsizliyi qaydaları" mövzusunda seminar- müşavirə keçirib.

Tədbirdə müxtəlif xarakterli fövqəladə halların yaranma səbəbləri, mülki müdafiə işinin təşkili, su hövzələrində təhlükəsizlik, məişətdə qazdan təhlükəsiz istifadə, ildırım, sel və daşqın zamanı hərəkət qaydaları və elektrikdən istifadə zamanı təhlükəsizlik tədbirlərinə dair məruzələr edilib, müzakirələr aparılıb.

Seminar-müşavirədə, həmçinin yanğın, dəm qazı, torpaq sürüşməsi zamanı təhlükəsiz davranış, odsöndürücü balonlardan istifadə qaydaları və fövqəladə hadisələrin vaxtında aradan qaldırılmasında "112" qaynar xətti"nin roluna dair məruzələr edilib, mövzularla bağlı fotoslayd və videoçarx nümayiş olunub, suallar cavablandırılıb.

***

Fövqəladə Hallar Nazirliyinin Şimal-qərb Regional Mərkəzi Zaqatala rayonu Əliabad qəsəbə Xəstəxanasında "Fövqəladə hallarla bağlı davranış qaydaları" mövzusunda maarifləndirmə tədbiri keçirib. Tədbirdə xəstəxananın tibb heyəti və texniki işçiləri iştirak ediblər.

İlk öncə dinləyicilərə "Fövqəladə hallar barədə ümumi məlumat", "Sel və daşqın", "Zəlzələ", "Dəm qazı", "Səhiyyə müəssisələrində yanğın təhlükəsizliyi qaydaları", "İlkin yanğınsöndürmə vasitələrindən istifadə qaydaları" və "112" qaynar xətti"  haqqında geniş məlumatlar verilib. Mövzular video-slayd vasitəsilə müşayiət olunub.

Sonra səhiyyə müəssisələrində fövqəladə hallarla bağlı mövzulara diqqətin artırılması, həmçinin, bu səpgidə təbliğat guşələrinin yaradılması tövsiyə olunub, mövzu ilə bağlı suallar cavablandırılıb.

***

Fövqəladə Hallar Nazirliyinin Gəncə Regional Mərkəzi Gəncə şəhəri 15 nömrəli körpələr evi-uşaq bağçasının kollektivi ilə  "Fövqəladə hallarla bağlı davranış qaydaları" mövzusunda maarifləndirmə tədbiri təşkil edib.

Gəncə Regional Dövlət Yanğın Nəzarəti İdarəsi əməkdaşlarının və müəssisənin kollektivinin iştirak etdiyi tədbirin keçirilməsində məqsəd müəssisənin kollektivinə müxtəlif xarakterli fövqəladə halların yaranma səbəbləri, onlardan qorunma üsulları haqqında biliklərin aşılanması olub.

Tədbirdə zəlzələ, "112" qaynar telefon xətti", dəm qazı, yanğınlar, odsöndürən balonlardan istifadə qaydaları haqqında geniş məlumat verilib, mövzulara aid slaydlar, videoçarxlar nümayiş olunub.

Sonda mövzulara dair suallar cavablandırılıb.



FHN-in əməkdaşı Avropa çempionatında bürünc medal qazanıb

Fövqəladə Hallar Nazirliyi İdman-sağlamlıq klubunun əməkdaşı, yüngül atlet Zəkiyyə Həsənova daha bir mötəbər beynəlxalq yarışdan medalla dönüb.

Növbəti uğuruna 10-11 avqust tarixlərində Makedoniyanın Skopye şəhərində keçirilən Avropa çempionatında imza atan Zəkiyyə Həsənova 13 ölkənin təmsil olunduğu çempionatın birinci günü 100 m məsafəyə qaçışda 11,94 saniyə, 4x100 m məsafəyə estafet qaçışında 46,92 saniyə nəticə ilə, yarışların  ikinci günü isə 200 m məsafəyə qaçışda 24,52 saniyə nəticə ilə bürünc medal qazanıb.

 



Su hövzələrində insanların təhlükəsizliyinin təmin olunması diqqətdə saxlanılır

Fövqəladə Hallar Nazirliyinin Sumqayıt Regional Mərkəzi Sumqayıt şəhəri ərazisində yerləşən çimərliklərdə istirahət edən vətəndaşlar arasında "Su hövzələrində insanların təhlükəsizliyinin təmin olunması" mövzusunda maarifləndirmə tədbiri keçirib.

Maarifləndirmə tədbirinin keçirilməsində məqsəd əhaliyə çimərliklərdən düzgün istifadə qaydaları, zərərçəkmişlərin xilas edilməsi və onlara ilkin tibbi yardımın göstərilməsi ilə bağlı biliklərin aşılanması olub.

Tədbirdə FHN-in Sumqayıt Regional Mərkəzinin, Kiçikhəcmli Gəmilərə Nəzarət və Sularda Xilasetmə Dövlət Xidmətinin "Sumqayıt", "Corat" və "H.Z.Tağıyev" xilasetmə məntəqələrin əməkdaşları, eləcə də şəhər sakinləri iştirak ediblər.

Mərkəzin və xilasetmə məntəqələrinin əməkdaşları çimərliklərdə istirahət edən vətəndaşlara su hövzələrində təhlükəsizlik qaydalarına riayət edilməsi, suda zərərçəkmişə ilkin yardımın göstərilməsi, qadağanedici nişanlara əməl olunması və çimərliklərdə sanitar-gigiyena qaydalarının tələblərinin yerinə yetirilməsi barədə ətraflı məlumat veriblər.

Vətəndaşlara suda hər hansı bədbəxt hadisənin baş verməsinin qarşısının vaxtında və operativ şəkildə alınması üçün bütün zəruri və qabaqlayıcı tədbirlərin görülməsi istiqamətində də tövsiyələr verilib. Vətəndaşlara mövzuya aid bukletlər, müxtəlif maarifləndirmə xarakterli təbliğat materialları paylanılıb, suallar cavablandırılıb.

 



Qəzetin çap variantı




Qəzet Azərbaycan Respublikasının Ədliyyə Nazirliyində qeydiyyatdan keçmişdir. Qeydiyyat nömrəsi - 1873.
Təsisçi Azərbaycan Respublikası Fövqəladə Hallar Nazirliyi.
Bütün hüquqlar qorunur.
© 2009-cu il