ENG     19 Dekabr 2018 -ci il
 
  Aktual
  Xəbərlər
  Cəmiyyət
  Maarifləndirmə
  Hadisə
  Müxtəlif
  Arxiv
15 Dekabr 2018-ci il
N 38 (596)

Əlaqə
Redaksiyanın ünvanı:
.......................................
Bakı şəhəri, Əliyar Əliyev küçəsi 3
.......................................
Tel.: 566 86 70
Faks: 566 86 71
566 86 74
566 86 79






  Baş səhifə / Cəmiyyət
Cəmiyyət
15 Dekabr 2018 Fövqəladə Hallar Nazirliyinin yaranmasından 13 il keçir
Təhlükəsiz həyatın keşiyində

Fövqəladə Hallar Nazirliyinin yaranmasından 13 il keçir
Təhlükəsiz həyatın keşiyində

"Bir hadisənin qarşısını almaq, o hadisə baş verəndən sonra onun nəticələrini aradan götürməkdən daha asandır".

Heydər Əliyev

Ümummilli Lider

Fövqəladə halların qarşısının alınması, əhalinin mülki müdafiəsinin təmin edilməsi dünya dövlətlərinin qarşısında duran ən prioritet məsələlərdəndir. Gözəl təbiətə, zəngin maddi resurslara, müasir texnoloji imkanlara malik olan ölkəmiz də təbii və texnogen hadisələrdən sığortalanmayıb. Əhəmiyyətli geostrateji mövqeyindən doğan riskləri də əlavə etsək, ölkəmizdə mülki müdafiənin təmin edilməsi, fövqəladə hadisələrə qarşı hazırlıqlı olması, yarana biləcək fəlakətlərə anında reaksiya verə bilmək qabiliyyəti həyati önəm daşıyır.

Bu səbəbdən, Fövqəladə Hallar Nazirliyi Azərbaycan Prezidenti İlham Əliyevin müvafiq sərəncamı ilə 2005-ci il dekabrın 16-da yaradıldı. Həyatın ən müxtəlif sahələrində təhlükəsizliyin təmin olunmasının bir mərkəzdə cəmləşdirilməsi dövlət başçısının müasir mülki müdafiə işinin təşkilinə uzaqgörən baxışlarının nəticəsi və mülki müdafiənin təmin olunması istiqamətində aparılan ciddi islahat idi. Ölkə başçısının hər il dekabrın 16-nın Nazirlik işçilərinin peşə bayramı günü kimi qeyd edilməsi ilə bağlı imzaladığı sərəncam isə bu sahəyə göstərilən diqqət və qayğının nümunəsi sayıla bilər.

Prezident İlham Əliyevin diqqət və qayğısı nəticəsində   ötən müddətdə Fövqəladə Hallar Nazirliyinin vahid idarəçilik sistemində insan təhlükəsizliyi ilə məşğul olan qurumlarının əlaqəli şəkildə, koordinasiya olunaraq daha çevik formada fəaliyyət göstərməsi üçün çox ciddi addımlar atıldı. Nəticədə nazirliyin maddi-texniki bazası möhkəmləndirildi, əsaslı təmir və yenidənqurma işləri ardıcıl olaraq həyata keçirildi. Fövqəladə Hallar Nazirliyinin üzərinə düşən vəzifələrin operativ və yüksək səviyyədə yerinə yetirilməsini təmin etmək məqsədilə 9 regional mərkəzin fəaliyyəti təmin olundu.

Ölkəmizdə reallaşdırılan müxtəlif xarakterli təlimlər, bunlardan xüsusilə "Xəzər-2009", "Xəzər-2010",  "Xəzər-2013", "Xəzər-2015" taktiki, "Xəzər-2017" beynəlxalq təlimləri FHN-in malik olduğu maddi-texniki bazanı, kadr potensialını və fövqəladə hadisələrə reaksiyasını, qəza-xilasetmə işlərindəki operativliyini nümayiş etdirməklə yanaşı, mülki müdafiə işinin lazımınca təşkil olunmasında, komandir-rəis heyətinin idarəetmə qabiliyyətinin yüksəldilməsində, axtarış, qəza-xilasetmə işlərində iştirak edən şəxsi heyətin praktiki vərdişlərinin təkmilləşdirilməsində əhəmiyyətli rol oynadı.

Azərbaycan vətəndaşlarının təhlükəsiz yaşayışını, onların mülki müdafiəsinin yüksək səviyyədə təşkil edilməsini, iş və istirahətinin təmin olunmasını ali məqsədi hesab edən Fövqəladə Hallar Nazirliyinin əməkdaşları ötən illər ərzində dəfələrlə çətin sınaqlardan layiqincə çıxdılar. Mingəçevir Su Elektrik Stansiyasının ərazisində baş vermiş torpaq sürüşməsi zamanı yaranmış təhlükənin operativ şəkildə aradan qaldırılması, Bakı şəhərindəki Naxçıvani və Murtuza Muxtarov küçələrinin kəsişməsində tikilən 16 mərtəbəli yaşayış binasının uçması nəticəsində əmələ gəlmiş dağıntılar altından insanların xilas edilməsi, sürüşməyə məruz qalmış ərazilərdə zərərçəkmiş əhali üçün yeni yaşayış qəsəbələrinin salınması, Neft Emalı Zavodunda yanğının söndürülməsi, Xəzər dənizində yerləşən "Bulla-dəniz" yatağında baş vermiş qəzanın aradan qaldırılması, Binəqədi rayonunda yerləşən çoxmərtəbəli yaşayış binasında dəhşətli yanğının söndürülməsi, "Günəşli" yatağındakı 10 saylı dərin dəniz özülündə baş vermiş qəzanın və "Azneft" İstehsalat Birliyinin Neft yığım məntəqəsində baş vermiş hadisənin nəticələrinin aradan qaldırılması istiqamətində görülən tədbirlər, onlarla digər belə əməliyyatlar hər dəfə təsdiqlədi ki, Fövqəladə Hallar Nazirliyi bütün, hətta ən çətin missiyaların belə öhdəsindən gəlməyə hazırdır.

Belə çətin sınaqlardan biri də 2010-cu ilin  yazında  baş verdi. Aramsız yağan leysan yağışları nəticəsində Kür və Araz çaylarında yaranan bolsululuq daşqınlara səbəb olmaqla Aran bölgəsində böyük təhlükələrə yol aça bilərdi. Prezident İlham Əliyevin hadisə ilə bağlı keçirdiyi müşavirələrdə və yerli sakinlərlə görüşlərində təbii fəlakətin qarşısının alınması, əhalinin təhlükəsiz yerlərə köçürülməsi, çayların kənarlarında bəndvurma işlərinin sürətləndirilməsi ilə bağlı verdiyi müvafiq tapşırıqların operativ icra olunması məqsədilə ekstremal şəraitdə işləyən Fövqəladə Hallar Nazirliyinin qüvvələri öz yüksək peşəkarlığını nümayiş etdirərək daşqın sularının sürətlə irəlilədiyi günlərdə insan itkisinə yol vermədi, əhalinin təxliyyəsini, bəndvurma və sahilbərkitmə işlərini uğurla həyata keçirdi. Subasma bölgəsində  yüzlərlə yeni evlər inşa olundu, yaşayış massivləri salındı, yenidən qurulan infrastrukturun, sosial və yaşayış obyektlərinin təhlükəsizliyinin təmin edilməsi məqsədilə bərpa və gücləndirmə işləri həyata keçirildi. Fövqəladə Hallar Nazirliyinin Müdafiə, Daxili İşlər, Səhiyyə nazirlikləri, Dövlət Sərhəd Xidməti, habelə digər dövlət qurumları ilə birgə fəaliyyəti irimiqyaslı təbii və ya texnogen fəlakətlərin qarşısının alınması və nəticələrinin aradan qaldırılmasında əhəmiyyətli rol oynadı.

Fövqəladə Hallar Nazirliyi tərəfindən 2012-ci ilin yazında ölkənin şimal-qərb bölgəsində baş verən 7 bal gücündə zəlzələnin nəticələrinin aradan qaldırılmasında əsl fədakarlıq nümunəsi göstərildi, bölgədə minlərlə fərdi evlər, yaşayış binaları, onlarla məktəblər, uşaq bağçaları tikildi, əhali yeni müasir evlərlə təmin edildi.

Azərbaycan dövlətinin əhalinin təbii və texnogen xarakterli qəzalardan, fövqəladə hadisələrdən etibarlı qorunmasına, mülki müdafiə işinin təşkilinə verdiyi daha bir önəmli hadisə Prezident İlham Əliyevin Fövqəladə Hallar Nazirliyinin Akademiyasının yaradılması ilə bağlı imzaladığı sərəncam oldu. Məhz Akademiyanın yaradılması əməkdaşların peşə ixtisaslarının artırılması, potensialının genişlənməsi və xüsusi ixtisaslı kadrların yetişməsi ilə bərabər, fövqəladə hallar, mülki müdafiə sisteminin ahəngdar inkişafı yolunda atılan mühüm addımlardandır.

Yarandığı ilk günlərdən etibarən Fövqəladə Hallar Nazirliyi beynəlxalq təcrübəyə xüsusi əhəmiyyət verdi,  fövqəladə halların idarə olunması üzrə böyük təcrübəyə malik bir çox nüfuzlu beynəlxalq və regional təşkilatlarla, o cümlədən xarici ölkələrin müvafiq dövlət qurumları ilə əməkdaşlıq münasibətlərinin inkişafına xüsusi diqqət yetirdi. Nazirliyin təşkilatçılığı ilə ötən illər ərzində mülki müdafiə sahəsində bir sıra regional və beynəlxaq əhəmiyyətli tədbirlər Azərbaycanda keçirildi. Bütün bunlar isə əməkdaşların bilik və bacarıqlarının, peşə hazırlıqlarının daha da artırılması, təcrübə mübadiləsinin həyata keçirilməsi baxımından əhəmiyyətli oldu.

Fövqəladə Hallar Nazirliyinin tərkibində hər  cür xilasetmə texnika və avadanlıqları, o cümlədən təyyarə və helikopterlərlə təchiz olunmuş xüsusi beynəlxalq axtarış-xilasetmə dəstəsi müxtəlif ölkələrdə baş vermiş fəlakətlərin nəticələrinin aradan qaldırılması, həmçinin, humanitar yardımların çatdırılması əməliyyatlarını uğurla yerinə yetirdi. Ölkə başçısının tapşırığına əsasən, 2010-cu ildə Rusiya Federasiyasında, 2010-cu və 2016-cı illərdə İsrail Dövlətində, 2017-ci ildə Gürcüstanda baş vermiş meşə yanğınları, 2010-cu ildə Pakistan İslam Respublikasındakı daşqınlar, 2011-ci ildə Türkiyə Respublikasının Van vilayətində zəlzələ, 2012-ci ildə Rusiya Federasiyasının Krasnodar diyarında və Dağıstan Respublikasındakı daşqınlar, həmin il İran İslam Respublikasında baş vermiş zəlzələ, 2014-cü ildə Əfqanıstan İslam Respublikasının şimalında baş vermiş leysan yağışlarının törətdiyi fəsadların, həmçinin, Serbiya Respublikası və Bosniya və Hersoqovinada daşqınların nəticələrinin aradan qaldırılması üçün Fövqəladə Hallar Nazirliyi tərəfindən müvafiq köməklik göstərildi, həmçinin, Azərbaycan Respublikasının hökuməti səviyyəsində 2010-cu ildə Haitidə baş vermiş zəlzələnin, 2013-cü ildə Filippində baş vermiş qarsırğanın fəsadlarının aradan qaldırılması məqsədilə və Somalidə aclıqdan əziyyət çəkən insanlar üçün maddi yardımlar edildi. Eyni zamanda, 2013-cü ildə Misirdəki iğtişaşlarla əlaqədar burada yaşayan azərbaycanlıların, 2015-ci ildə Nepalda baş vermiş dağıdıcı zəlzələ nəticəsində fəlakət zonasında olan soydaşlarımızın və xarici ölkə vətəndaşlarının Fövqəladə Hallar Nazirliyinə məxsus təyyarə ilə təcili təxliyəsi həyata keçirildi. 2017-ci ildə Azərbaycan Hökuməti adından Cibuti Respublikasına, həmçinin Myanmada Rohingya müsəlmanlarına qarşı davam edən kütləvi zorakılıq zəminində əziyyət çəkən insanlara kömək göstərmək məqsədilə humanitar yardımlar çatdırıldı.

Böyük təcrübəyə, geniş kadr potensialına və zəngin maddi-texniki bazaya malik olan Fövqəladə Hallar Nazirliyi ölkəmizin beynəlxalq arenada əldə etdiyi nailiyyətlərə də öz töhfəsini verir. Son illər bir çox mötəbər beynəlxalq tədbirlərə, o cümlədən böyük idman yarışlarına, "Eurovision-2012" mahnı müsabiqəsinə ev sahibliyi edən respublikamızda təhlükəsizlik tədbirlərinin yüksək səviyyədə təşkil olunması, baş verə biləcək istənilən fövqəladə hadisənin qarşısının vaxtında alınması istiqamətində Fövqəladə Hallar Nazirliyinin aidiyyəti üzrə gördüyü tədbirlər ölkə rəhbərliyi tərəfindən göstərilən etimadın doğrulması istiqamətində atılan addımlardandır. Tarixə qızıl hərflərlə yazılan 2015-ci ilin iyun ayında ölkəmizdə keçirilən Birinci Avropa Oyunları, 2017-ci ilin may ayında Bakıda keçirilən dördüncü İslam həmrəyliyi oyunları, Formula 1 yarışları zamanı Fövqəladə Hallar Nazirliyi tərəfindən genişmiqyaslı texniki və təhlükəsizlik tədbirlər proqramı həyata keçirildi, insanların təhlükəsizliyinin təmin edilməsi məqsədilə qabaqlayıcı addımlar atıldı.

Fövqəladə Hallar Nazirliyinin yaranmasını ölkəmizin həyatında çox əlamətdar bir hadisə kimi qiymətləndirən Azərbaycan Prezidenti İham Əliyev deyib: "Həyat göstərdi ki, nazirliyin yaranmasında böyük zərurət var idi. Fövqəladə Hallar Nazirliyinin yaranması, formalaşması və bugünkü uğurlu fəaliyyəti Azərbaycanın inkişafı üçün çox müsbət rol oynamışdır. İstər mülki məsələlərdə, istər təbii fəlakətlərin nəticələrinin aradan qaldırılmasında Fövqəladə Hallar Nazirliyinin fəaliyyətini biz görürük, Azərbaycan ictimaiyyəti də görür və bunu yüksək qiymətləndirir".

Bu gün hər bir Azərbaycan vətəndaşı dara düşəndə "112" nömrəsini yığaraq, vaxtında və keyfiyyətli yardım ala bilir. Fövqəladə Hallar Nazirliyinin qüvvələri lazımi anda, lazımi yerdə fəlakətlə üzləşən insanların yanında olmağı bacarır və hər zaman Azərbaycan vətəndaşlarının dincliyi, rahatlığı və təhlükəsizliyinin keşiyindədir.



Qəzetin çap variantı




Qəzet Azərbaycan Respublikasının Ədliyyə Nazirliyində qeydiyyatdan keçmişdir. Qeydiyyat nömrəsi - 1873.
Təsisçi Azərbaycan Respublikası Fövqəladə Hallar Nazirliyi.
Bütün hüquqlar qorunur.
© 2009-cu il