Geri

"Sənaye müəssisələrində texniki təhlükəsizliyin təhlili və qabaqlayıcı-profilaktik tədbirlərin görülməsi" mövzusunda regional seminar-müşavirə keçirilib

Martın 5-də Gəncə şəhərində Nazirliyin Sənayedə İşlərin Təhlükəsiz Görülməsi və Dağ-mədən Nəzarəti Dövlət Agentliyi tərəfindən "Sənaye müəssisələrində texniki təhlükəsizliyin təhlili və qabaqlayıcı-profilaktik tədbirlərin görülməsi" mövzusunda regional seminar-müşavirə keçirilmişdir. Seminar-müşavirənin keçirilməsində əsas məqsəd regionda fəaliyyət göstərən təhlükə potensiallı sənaye müəssisələrinin rəhbərlərinə, sahibkarlara, iş adamlarına və fiziki şəxslərə təmsil etdikləri sahədə baş verə biləcək qəza və bədbəxt hadisələrin vaxtında xəbərdar edilməsi, qarşısının alınması istiqamətində təcili, qabaqlayıcı-profilaktik tədbirlərin görülməsi olub.

Tədbirdən əvvəl iş prosesində istifadə olunan avadanlıqların təqdimatı keçirilib. Mərasim iştirakçılarına məlumat verilib ki, nümayiş olunan və beynəlxalq tələblərə cavab verən ölçü vasitələri, müxtəlif təyinatlı cihazlar və qurğular vasitəsi ilə qüsurlar yüksək dəqiqliklə aşkarlanır. Beynəlxalq normalara uyğun olaraq hazırlanmış və təhlükəsizlik tələblərinə tam cavab verən geniş çeşidli işçi geyimlər iştirakçıların marağına səbəb olub.

Mərasim iştirakçıları Sənayedə İşlərin Təhlükəsiz Görülməsi və Dağ-mədən Nəzarəti Dövlət Agentliyinin fəaliyyətindən bəhs edən video görüntüləri izləyib, sənayenin bütün sahələrini əhatə edən texniki təhlükəsizlik və əməyin mühafizəsi məsələləri ilə bağlı normativ texniki sənədlərlə tanış olublar.

Sonra mərasim öz işinə başlayıb. Sənayedə İşlərin Təhlükəsiz Görülməsi və Dağ-mədən Nəzarəti Dövlət Agentliyinin rəis müavini İsmayıl Məşədiyev Fövqəladə Hallar Nazirliyi tərəfindən təhlükə potensiallı obyektlərdə və dağ-mədən sahələrində texniki təhlükəsizliyin inkişafı istiqamətində görülən tədbirlər barədə məruzə ilə çıxış edib. Texniki təhlükəsizlik sahəsində dövlət nəzarətini həyata keçirən, respublika sənayesinin bütün sahələrini əhatə edən Agentliyin qurumları, fəaliyyət istiqamətləri haqqında ətraflı məlumat verib, ölkənin 4 regionunda Regional sənayedə işlərin təhlükəsiz görülməsi və dağ-mədən nəzarəti müfəttişliklərinın yaradıldığını bildirib. Qeyd olunub ki, qısa müddət ərzində Agentlik mütəxəssislərlə tam komplektləşdirilib, maddi-texniki baza möhkəmləndirilib. Respublikada fəaliyyət göstərən təhlükə potensiallı obyektlər Agentlik tərəfindən nəzarətə götürülməklə qeydiyyata alınıb.

Texniki təhlükəsizlik ekspertizasının aparılmasında əsas istiqamətlər barədə məruzə ilə çıxış edən Sənayedə İşlərin Təhlükəsiz Görülməsi və Dağ-mədən Nəzarəti Dövlət Agentliyinin Azərbaycan Dövlət Əməyin Mühafizəsi və Təhlükəsizlik Texnikası Elmi-Tədqiqat İnstitutunun direktoru Rüştü Səfərov texniki ekspertiza işlərinin qüvvədə olan qanunvericilik sənədləri, dövlət standartları, normativ texniki sənədlər, əməyin mühafizəsi və təhlükəsizlik texnikası qaydaları əsasında aparıldığını bildirib. O, sənaye sahələrində mövcud çatışmazlıqların sistemli şəkildə araşdırıldığını, mümkün pozuntuların aradan qaldırılması istiqamətində kompleks tədbirlərin hazırlanaraq, ardıcıl həyata keçirildiyini iştirakçıların diqqətinə çatdırıb. Eyni zamanda bildirib ki, təhlükə potensiallı obyekti istismar edən hüquqi və fiziki şəxslər texniki təhlükəsizliyin vəziyyəti barədə Sənayedə İşlərin Təhlükəsiz Görülməsi və Dağ-mədən Nəzarəti Dövlət Agentliyinə bəyannamə təqdim etməlidirlər.

Sənayedə baş verə biləcək bütün qəza növlərinə aid xəbərdarlıq, qəzanın nəticələrinin ləğvi və işçilərin təxliyə edilməsi üzrə əlaqələndirilmiş operativ fəaliyyət, rəhbərlik və təşkilatçılıq funksiyalarının dəqiq yerinə yetirilməsi qaydalarını əks etdirən təlimatların işlənib hazırlandığını bildirən R.Səfərov belə bir məqama da toxunub ki, qüvvədə olan təlimatlara uyğun olaraq, vizual nəzarət, mayenin hopdurulması, maqnit tozu, ultrasəs üsulları ilə əmələ gəlmiş qüsurlar aşkar edilir. Görülən profilaktik və qabaqlayıcı tədbirlər, eləcə də verilən tövsiyələr baş verə biləcək qəza hadisələrinin qarşısının alınmasına köməklik göstərir.

O, tədbir iştirakçılarının nəzərinə çatdırıb ki, respublikanın qaz təchizatı sistemində qəza və bədbəxt hadisələrin yaranmasına səbəb ola bilən şəraitin aradan qaldırılması məqsədi ilə Agentlik öz səlahiyyətləri daxilində müvafiq işlər apararaq yüzlərlə qəza və bədbəxt hadisələrin baş verməsinin qarşısını alıb.

Seminar-müşavirədə, həmçinin, digər məruzələr dinlənilib və mərasim iştirakçılarını maraqlandıran suallar cavablandırılıb.

Digər məlumatlar

FHN Mətbuat xidmətinin məlumatı

15 noyabr 2019-cu il tarixində saat 01:34 dəqiqədə Fövqəladə Hallar Nazirliyinin "112" qaynar telefon xəttinə Bakı şəhəri, Xətai rayonu, Neapol küçəsi, 16 ünvanında yerləşən 29/42 saylı 17 mərtəbəli mansard tipli yaşayış binasının dam örtüyündə yanğın baş verməsi barədə məlumat daxil olub....

Ardını oxu

Nazir müavini Etibar Mirzəyev NATO-nun Təbii Fəlakətlərə Cavabvermə üzrə Avro-Atlantika Koordinasiya Mərkəzinin regional əlaqələndiricisi Vanhamme Villem ilə görüşüb

Fövqəladə Hallar nazirinin müavini general-leytenant Etibar Mirzəyev 3-8 noyabr 2019-cu il tarixlərində Azərbaycan Respublikası Fövqəladə Hallar Nazirliyinin və Birləşmiş Millətlər Təşkilatının Humanitar Məsələlərin Əlaqələndirilməsi Ofisinin birgə təşkilatçılığı ilə FHN Akademiyasında “Zəlzələ hadisələrində cavabvermə” mövzusunda keçirilən beynəlxalq regional təlimdə iştirak edən NATO-nun Təbii Fəlakətlərə Cavabvermə üzrə Avro-Atlantika......

Ardını oxu

“Zəlzələ hadisələrində cavabvermə” mövzusunda beynəlxalq regional təlim uğurla başa çatdı

3-8 noyabr 2019-cu il tarixlərində Azərbaycan Respublikası Fövqəladə Hallar Nazirliyinin və Birləşmiş Millətlər Təşkilatının Humanitar Məsələlərin Əlaqələndirilməsi Ofisinin birgə təşkilatçılığı ilə paytaxtın Suraxanı rayonunun Hövsan qəsəbəsində yerləşən FHN Akademiyasında “Zəlzələ hadisələrində cavabvermə” mövzusunda keçirilən beynəlxalq regional təlimə yekun vurulub. ...

Ardını oxu