Geri

FHN-in Bakı Regional Mərkəzi “Cəsurluq məktəbi” Açıq Qapı günü keçirmişdir

Fövqəladə Hallar Nazirliyinin Bakı Regional Mərkəzi 2016-cı il noyabr ayının 24-də “Cəsurluq məktəbi” Açıq Qapı günü keçirmişdir.

Peşəyönümü xarakterli Açıq Qapı gününün keçirilməsində əsas məqsəd Bakı şəhəri orta məktəblərinin yuxarı siniflərində təhsil alan və fövqəladə hallar orqanlarında işə maraq göstərən şagirdləri bir araya toplayaraq onları nazirliyin, o cümlədən Mərkəzin fəaliyyəti ilə daha yaxından tanış etmək, şagirdləri maraqlandıran sualları cavablandırmaqdan ibarət olmuşdur.

“Cəsurluq məktəbi” Açıq Qapı gününün iştirakçılarının müəyyən edilməsində “Fokus qrup” üsulundan istifadə edilmiş, yəni, bütün iştirakçı şagirdlər onların fərdi maraqları və keyfiyyətləri nəzərə alınmaqla, Bakı Şəhəri üzrə Təhsil İdarəsi tərəfindən seçilmiş, nəticədə paytaxtın 12 inzibati rayonunun hər birindən 5 nəfər olmaqla 60 yuxarı sinif şagirdi müəyyən edilərək, tədbirdə iştirak üçün tövsiyə edilmişdir.

Bakı Regional Mərkəzinin nazirliyin digər qurumları ilə imzalanmış Qarşılıqlı Fəaliyyət Planlarına əsasən, tədbirdə Mülki müdafiə qoşunları, Xüsusi Riskli Xilasetmə, Dövlət Yanğından Mühafizə, Dövlət Sularda Xilasetmə və Tibb xidmətlərini təmsil edən 55 əməkdaşı iştirak etmişdir.

Tədbir praktik və nəzəri olmaqla iki hissədən ibarət olmuşdur.

Praktik hissə zamanı “Sprinter” (Mercedes BENZ) markalı xüsusi təyinatlı avtomobil və onun təchiz olunduğu spesifik alət və avadanlıqlar, əraziyə gətirilmiş sularda xilasetmə və dalğıc avadanlıqları, kəşfiyyat cihazları və fərdi mühafizə vasitələri, yanğınsöndürmə texnika və vasitələri, eləcə də mulyaj üzərində yaralılara ilkin tibbi yardımın həyata keçirilmə yolları, sınıqlar və qanaxmalar zamanı yardım üsulları barədə məlumat verilmişdir.

Daha sonra müəyyən edilmiş təlim nöqtələri üzrə xilasetmə əməliyyatları həyata keçirilmişdir. Bu zaman ərazidə ümumi, kimya, radiasiya, mühəndis və yanğın kəşfiyyatının aparılması, kinologiya xidməti tərəfindən xüsusi təlim keçmiş itlərin köməyilə xəsarət alanların axtarışı, yanğının söndürülməsi, xilasetmə əməliyyatının həyata keçirilməsi, köməksiz vəziyyətdə qalanların hündürmərtəbəli tikilidən alpinist avadanlıqları və hava yastığı vasitəsilə təxliyə edilməsi, qəza nəticəsində deformasiyaya uğramış avtomobildə sıxılmış vəziyyətdə qalmış sərnişinin xilas edilməsi, eləcə də xəsarətalanlara ilkin tibbi yardımın göstərilməsi üzrə praktik təqdimatlar nümayiş etdirilmişdir.

Mərkəzin inzibati binasının akt zalında keçirilmiş nəzəri hissə zamanı isə tədbir iştirakçılarına fövqəladə hallar barədə ümumi məlumatlar verilmiş, “Zəlzələ zamanı davranış qaydaları”, “Torpaq sürüşməsi zamanı davranış qaydaları”, “Məişətdə yanğın zamanı davranış qaydaları”, “Dəm qazı”, “Odsöndürücü balonlardan istifadə qaydaları”, “Çimərliklərdə təhlükəsizlik qaydaları” və “112” qaynar xətti” mövzularında təqdimatlar, eləcə də nazirlik tərəfindən hazırlanmış videoçarxlar nümayiş olunmuş, şagirdləri maraqlandıran suallar ətraflı cavablandırılmışdır.

 

Digər məlumatlar

FHN-in Sumqayıt Regional Mərkəzi “dəyirmi masa” keçirmişdir

Fövqəladə Hallar Nazirliyinin Sumqayıt Regional Mərkəzi 19 sentyabr 2018-ci il tarixində Xızı rayonu Ağdərə Bələdiyyəsində “Fövqəladə halların qarşısının alınması və nəticələrinin aradan qaldırılması sahəsində Regional Mərkəzlə yerli özünüidarəetmə orqanlarının qarşılıqlı fəaliyyətinin təşkili” mövzusunda dəyirmi masa keçirmişdir. ...

Ardını oxu

FHN-in Sumqayıt Regional Mərkəzi mülki müdafiə kursları təşkil etmişdir

Fövqəladə Hallar Nazirliyinin Sumqayıt Regional Mərkəzi 1-15 sentyabr 2018-ci il tarixlərində Mərkəzin əhatə etdiyi ərazi üzrə şəhər və rayonların ümumtəhsil müəssisələrində mülki müdafiə fənnini tədris edən 2-ci, 5-ci və 6-cı sinif rəhbərləri üçün kurslar təşkil etmişdir. ...

Ardını oxu

Fövqəladə Hallar Nazirliyinin Qarabağ Regional Mərkəzi maarifləndirmə tədbiri keçirmişdir

Qarabağ Regional Mərkəzi 18 sentyabr 2018-ci il tarixində Beyləqan rayon “Yeni Xocavənd” qəsəbəsində yerləşən Xocavənd rayon Kuropatkin kənd Uşaq Bağçasında “Fövqəladə hallarla bağlı davranış və yanğın təhlükəsizliyi qaydaları”  mövzusunda maarifləndirmə tədbiri keçirmişdir....

Ardını oxu